បរទេស៖ Jadon Sancho បានស្នើសុំអោយក្រុមបិសាចក្រហម Man. Utd អោយផ្តល់ដល់រូបគេនូវឯកសណ្ឋានអាវលេខ ៧ សម្រាប់ចូលលេងនៅរដូវកាលក្រោយ ដោយយោងគេហទំព័រ The Guardian បានអោយដឹងថាខ្សែបម្រើ-ប្រយុទ្ធស្លាបរូបនេះមានបំណងចង់ដើរតាមគន្លងរបស់វីរបុសក្លឹបមានដូចជា Eric Ericona, David Beckham និង Cristiano Ronaldo សម្រាប់លេខអាវដ៏ពេញនិយមមួយនេះ ។ ទោះជាយ៉ាងណាបច្ចុប្បន្នលេខអាវមួយនេះកំពុងត្រូវបានកាន់កាប់ដោយខ្សែប្រយុទ្ធ Edinson Cavani ដែលបានចុះកុងត្រាថ្មីរយៈពេល ១២ ខែបន្តលេងនៅទឹកដី Old Trafford ហើយបច្ចុប្បន្នក្លឹបនៅឡើយមិនទាន់បានឆ្លើយតបតាមការស្នើសុំនៅឡើយនោះទេ។
គួរបញ្ជាក់ថាកីឡាករវ័យ ២១ ឆ្នាំរូបនេះជិតឈានដល់ការចុះកុងត្រាជាមួយក្រុមម្ចាស់ជើងឯកអង់គ្លេសចំនួន ២០ សម័យកាលខណៈដែលMan.Utd រំពឹងថានឹងត្រូវចំណាយប្រាក់ដល់ Dortmund ក្នុងតម្លៃប្រមាណ ៧៣ លានផោនសម្រាប់អតីតយុវជនក្លឹបមេឃខៀវ Man. City រូបនេះ ។Sancho បច្ចុប្បន្នគឺកំពុងតែមានភារកិច្ចជួយក្រុមតោកំណាចអង់គ្លេសសម្រាប់ព្រឹត្តិការណ៏Euro ២០២០ នឹងត្រៀមចុះកិច្ចសន្យារយៈពេល ៥ ឆ្នាំជាមួយក្រុមលោក Ole Gunnar Solskjaer ក្រោយបញ្ចប់ការពិនិត្យសុខភាពដោយ ជោគជ័យ។
Sancho រកបាន៥០ គ្រាប់និងបង្កើតឪកាសបញ្ចប់ទីបាន ៦៤ ដងក្នុងការបង្ហាញខ្លួន ១៣៧ លើកសម្រាប់ក្លឹបនៅលីកកំពូលអាឡឺម៉ង់ក្នុងនោះ ១៦ គ្រាប់និងAssist ២០ លើកធ្វើបាននៅគ្រប់ក្របខណ្ឌប្រកួតចំនួន ៣៨ដង កាលពីរដូវកាលមុន៕
ប្រភពព័ត៍មាន៖ Sportsmole