បរទេស៖ ក្រុមបាល់ទាត់ជម្រើសជាតិដាណឺម៉ាក កំពុងតែសុបិនក្នុងការធ្វើឲ្យបានល្អដូចទៅនឹងក្រុម ដែលបានឈ្នះពាន Euro ក្នុងឆ្នាំ១៩៩២ ប៉ុន្តែ ក្រុមដែលកំពុងតែឈរបាំងផ្លូវរបស់ពួកគេឆ្ពោះទៅកាន់វគ្គពាក់កណ្តាលផ្តាច់ព្រ័ត្រ នាព្រឹត្តិការណ៍ Euro ឆ្នាំ២០២០ នៅថ្ងៃសៅរ៍ ចុងសប្តាហ៍នេះ គឺសាធារណរដ្ឋឆែក ដែលធ្លាប់ទម្លាក់ពួកគេកាលពីមុន។
ដាណឺម៉ាក បានស្ថិតក្នុងគ្រោះថ្នាក់នៃការធ្លាក់ចេញត្រឹមវគ្គចែកពូល ក្រោយពីបានរងបរាជ័យក្រោមស្នាដៃក្រុមជម្រើសជាតិហ្វាំងឡង់ និងបែលហ្ស៊ិក ខណៈដែលការប្រកួតបើកឆាករបស់ពួកគេ ត្រូវបានរំខានដោយសារតែតារាឆ្នើម Christian Eriksen បានជួបបញ្ហាគាំងបេះដូង និងដួលនៅលើទីលាន។ ប៉ុន្តែ ពួកគេបានបង្កើតភាពរំភើបរីករាយឡើងវិញនៅទីក្រុង Copenhagen តាមរយៈការផ្តួលក្រុមជម្រើសជាតិរុស្ស៊ី យ៉ាងចាស់ដៃក្នុងលទ្ធផល ៤-១ ដើម្បីបញ្ចប់ក្នុងចំណាត់ថ្នាក់លេខ២ ក្នុងពូល B មុនពេលធ្វើដំណើរទៅទីក្រុង Amsterdam ដើម្បីផ្តួលក្រុមជម្រើសជាតិវេលស៍ ក្នុងលទ្ធផល ៤-០ ក្នុងវគ្គ១៦ក្រុមចុងក្រោយ។
ដាណឺម៉ាក មិនធ្លាប់បានឈានទៅវគ្គពាក់កណ្តាលផ្តាច់ព្រ័ត្រក្នុងយុទ្ធនាការធំមួយសោះ បើគិតចាប់តាំងពីបានលើកពាន Euro កាលពី២៩ឆ្នាំមុន ដែលនៅពេលនោះ ពួកគេមិនបានឈ្នះសិទ្ធិទៅប្រកួតឡើយ ប៉ុន្តែ បានចូលជំនួសក្រុមយូហ្គោស្លាវី។ នៅមុនពេលការប្រកួតវគ្គ៨ក្រុមចុងក្រោយជាមួយនឹងក្រុមឆែក នៅទីក្រុង Baku នៅថ្ងៃសៅរ៍ លោក Kasper Hjulmand គ្រូបង្វឹកក្រុមដាណឺម៉ាក បានឲ្យដឹងថា៖«នេះជាឱកាសដែលយើងអាចមិនមានម្តងទៀតឡើយ។ យើងចង់ឆក់ឱកាសនេះឲ្យបាន»៕
ប្រភពព័ត៌មាន៖ Channel News Asia
