បរទេស៖ លោក Gareth Southgate បានបញ្ជាក់ថា ក្រុមបាល់ទាត់ជម្រើសជាតិអង់គ្លេស ត្រៀមខ្លួនរួចរាល់ក្នុងការបញ្ចប់សំណាងអាក្រក់របស់ពួកគេក្នុងវគ្គពាក់កណ្តាលផ្តាច់ព្រ័ត្រ ខណៈដែលពួកគេត្រៀមជួបជាមួយនឹងក្រុមជម្រើសជាតិដាណឺម៉ាក ក្នុងវគ្គ៤ក្រុមចុងក្រោយនៃព្រឹត្តិការណ៍ Euro ឆ្នាំ២០២០ ដោយសម្លឹងរកការឈ្នះកៅអីទៅវគ្គផ្តាច់ព្រ័ត្រក្នុងយុទ្ធនាការធំជាលើកទី១របស់ពួកគេ បើគិតចាប់តាំងពីឆ្នាំ១៩៦៦។
អង់គ្លេស បានបញ្ចប់ដោយការឈរលេខ១ក្នុងពូល និងបានផ្តួលគូសត្រូវចាស់ អាល្លឺម៉ង់ ក្នុងវគ្គ១៦ក្រុមចុងក្រោយ នៅមុនពេលផ្តួលក្រុមជម្រើសជាតិអ៊ុយក្រែន ក្នុងលទ្ធផល ៤-០ ក្នុងវគ្គ៨ក្រុមចុងក្រោយ ក្នុងទីក្រុងរ៉ូម។ ប៉ុន្តែ ក្រុមតោកំណាចទាំ៣មួយនេះ មានទម្លាប់ជួបសំណាងអាក្រក់មុនវគ្គផ្តាច់ព្រ័ត្រក្នុងយុទ្ធនាការធំៗចំនួន៤លើកមកហើយ បើគិតចាប់តាំងពីឈ្នះពាន World Cup ឆ្នាំ១៩៦៦ ក្នុងនោះរាប់បញ្ចូលទាំងការចាញ់ក្រោមស្នាដៃក្រុមជម្រើសជាតិក្រូអាស៊ី ក្នុង World Cup នៅប្រទេសរុស្ស៊ី កាលពី៣ឆ្នាំមុនផងដែរ។
ប៉ុន្តែ លោក Southgate ជឿជាក់ថា ក្រុមរបស់លោកបានរៀនមេរៀនពីការខកចិត្តទាំងនោះហើយ និងត្រៀមខ្លួនរួចរាល់ ក្នុងការបោះជំហានទៅមុខ។ លោកបានឲ្យដឹងថា៖ «យើងបានលុបចោលសំណាងអាក្រក់ ឬរបារសំខាន់ៗរួចមកហើយ ហើយខ្ញុំគិតថា ក្រុមកីឡាករទាំងនេះ នឹងមានអារម្មណ៍ថា នេះគឺជាការប្រជែងបន្ទាប់របស់ពួកគេ»៕
ប្រភពព័ត៌មាន៖ Channel News Asia
