បរទេស៖ ក្រុមបាល់ទាត់ជម្រើសជាតិអ៊ីតាលី បានផ្តួលក្រុមជម្រើសជាតិអេស្ប៉ាញ ដោយការស៊ុតបាល់ប៉េណាល់ទីក្នុងលទ្ធផល ៤-២ ក្រោយពីបានបញ្ចប់ក្នុងលទ្ធផលស្មើ ១-១ ក្នុងការប្រកួតដ៏រំភើបនាព្រឹត្តិការណ៍ Euro ឆ្នាំ២០២០ វគ្គពាក់កណ្តាលផ្តាច់ព្រ័ត្រ នាកីឡដ្ឋាន Wembley កាលពីថ្ងៃអង្គារ ខណៈដែល Jorginho បានស៊ុតបាល់ប៉េណាល់ទីកាត់សេចក្តី ដើម្បីជួយឲ្យក្រុមខ្លួនទៅវគ្គផ្តាច់ព្រ័ត្រ។
អ៊ីតាលី មិនបានស្ថិតក្នុងទម្រង់លេងដ៏ល្អបំផុតរបស់ខ្លួនឡើយ ខណៈដែលអេស្ប៉ាញ បានបង្ហាញពីកម្រិតលេងល្អប្រសើរជាង នៅក្នុងការប្រកួតនេះ នៅមុនពេល Federico Chiesa ដែលជាខ្សែប្រយុទ្ធរបស់ក្លិប Juventus បានជួយឲ្យអ៊ីតាលី រកបានគ្រាប់បាល់មុន នៅនាទី ទី៦០ ក្នុងការប្រកួតដែលមានអ្នកគាំទ្រសរុប៥៨០០០នាក់។ ខ្សែប្រយុទ្ធ Alvaro Morata ដែលមិនបានជាប់ក្នុងជម្រើសទាំង១១នាក់ដំបូង បានចូលលេងក្នុងនាមជាកីឡាករបម្រុងដើម្បីរកគ្រាប់បាល់តាមស្មើវិញនៅរយៈពេល១០នាទីចុងក្រោយ ប៉ុន្តែ ក៏ជាអ្នកដែលស៊ុតបាល់ប៉េណាល់ទីមិនចូលទីផងដែរ។
មិនមានគ្រាប់បាល់បន្ថែមទៀតឡើយនៅនាទីបន្ថែម១៥នាទី២ដង ខណៈដែលអេស្ប៉ាញ បែរជាចាញ់ក្នុងការស៊ុតបាល់ប៉េណាល់ទី ក្រោយពីបានយកឈ្នះលើក្រុមជម្រើសជាតិស្វ៊ីស ដោយការស៊ុតបាល់ប៉េណាល់ទីដូចគ្នានេះ កាលពីវគ្គមុន។ អ៊ីតាលី នឹងត្រូវប៉ះអង់គ្លេស ឬដាណឺម៉ាក ក្នុងវគ្គផ្តាច់ព្រ័ត្រ នាកីឡដ្ឋាន Wembley នៅថ្ងៃអាទិត្យនេះ ហើយពួកគេនឹងសម្លឹងរកការឈ្នះពាន Euro ជាលើកទី១ បើគិតចាប់តាំងពីឆ្នាំ១៩៦៨៕
ប្រភពព័ត៌មាន៖ Channel News Asia
