បរទេស៖ តារាឆ្នើម Lionel Messi និង Neymar ដែលជាអតីតមិត្តរួមក្លិបនៅ Barcelona នឹងត្រូវក្លាយគូប្រកួតគ្នានៅក្នុងព្រឹត្តិការណ៍ Copa America វគ្គផ្តាច់ព្រ័ត្រ នៅថ្ងៃសៅរ៍ (ត្រូវនឹងព្រឹកថ្ងៃអាទិត្យ នៅកម្ពុជា) ខណៈដែលពួកគេនឹងសម្លឹងរកការបញ្ចប់សំណាងអាក្រក់ ដែលបានជះឥទ្ធិពលមិនល្អដល់កីឡាករឆ្នើមៗជាច្រនដល់ប្រទេសទាំង២។
មិនខុសអ្វីពីលោក Pele អតីតតារាឆ្នើមរបស់ប្រេស៊ីល និងលោក Diego Maradona របស់អាហ្សង់ទីន ឡើយ ខណៈដែលទាំង Messi និង Neymar សុទ្ធសឹងមិនធ្លាប់បានឈ្នះពាន Copa America សោះ។ ស្ថិតិទាំងនេះ នឹងផ្លាស់ប្តូរ សម្រាប់កីឡាករម្នាក់ក្នុងចំណោមតារាឆ្នើមទាំង២ ក្នុងការប្រកួតវគ្គផ្តាច់ព្រ័ត្រដ៏រំភើបនាកីឡដ្ឋាន Maracana ក្នុងទីក្រុង Rio de Janeiro។ សម្រាប់ Messi ដែលជាម្ចាស់ពានបាល់មាស៦សម័យកាល នេះនឹងក្លាយជាការប្រកួតដណ្តើមពាន Copa America វគ្គផ្តាច់ព្រ័ត្រជាលើកទី៤របស់គេ ហើយក៏ប្រហែលជាឱកាសចុងក្រោយរបស់គេផងដែរ ក្នុងការបញ្ចប់ក្នុងនាមជាក្រុមជើងឯក។ រូបគេគឺជាកីឡាករដែលមានទម្រង់លេងល្អផ្តាច់គេប្រចាំក្រុមរបស់ខ្លួន តាមរយៈការស៊ុតបាល់បញ្ចូលទី៤គ្រាប់ និងជួយឲ្យមិត្តរួមក្រុមរកបាន៥គ្រាប់ផ្សេងទៀត ខណៈដែលរូបគេក៏កំពុងតែស្ថិតក្នុងចំណាត់ថ្នាក់លេខ១ក្នុងនាមជាអ្នករកបានគ្រាប់បាល់ជាងគេប្រចាំយុទ្ធនាការផងដែរ។
ប៉ុន្តែ ស្ថិតក្នុងវ័យ៣៤ឆ្នាំ នេះប្រហែលជាការប្រកួត Copa America ជាលើកចុងក្រោយរបស់គេ ហើយព្រឹត្តិការណ៍ World Cup នៅឆ្នាំក្រោយ ក៏អាចនឹងក្លាយជាយុទ្ធនាការអន្តរជាតិចុងក្រោយរបស់គេផងដែរ។ ខ្សែការពារកណ្តាលអន្តរជាតិប្រេស៊ីល Marquinhos បានឲ្យដឹងថា៖ «យើងនឹងព្យាយាមបញ្ឈប់រូបគេ មិនឲ្យគេសម្រេចគោលដៅនេះឡើយ»៕
ប្រភពព័ត៌មាន៖ Channel News Asia