ខ្សែប្រយុទ្ធជួរមុខ Ajayi Opeyemi Korede របស់ក្រុមវិសាខា មានការជឿជាក់ថា ពួកគេនឹងអាចដណ្តើមបាន៣ពិន្ទុ ពីក្រុមអាស៊ីអឺរ៉ុប សម្រាប់ការប្រកួតលីគកំពូលកម្ពុជា លើកនេះ ចំណែកក្រុមខ្លាំងកំពុងឈរនៅតំបន់កំពូលតារាងទាំង៥ មានអង្គរថាយហ្គឺរ ភ្នំពេញក្រោន បឹងកេត និងព្រះខ័នរាជស្វាយរៀង ក៏មានភាគរយខ្ពស់ ក្នុងការទទួលបានជ័យជម្នះ នៅថ្ងៃសៅរ៍ និងថ្ងៃអាទិត្យ នេះដូចគ្នា។
សម្រាប់ការប្រកួត នៅសប្តាហ៍នេះ ក្រុមវិសាខា ត្រូវធ្វើដំណើរទៅជួបក្រុមអាស៊ីអឺរ៉ុប ដែលពួកគេ ធ្លាប់លត់ ១០-១ សម្រាប់ការជួបគ្នា កាលពីរដូវកាល ឆ្នាំ២០២០ ហើយលើកនេះ Ajayi នៅតែមានការជឿជាក់ថា ពួកគេ នឹងបន្តយកឈ្នះក្រុមអាស៊ីអឺរ៉ុប ជាក់ជាមិនខាន។
ខ្សែប្រយុទ្ធនីហ្សេរីយ៉ា Ajayi បានលើកឡើងថា៖ «បច្ចុប្បន្ន អាស៊ីអឺរ៉ុប មិនមែនជាក្រុមងាយស្រួល នៅលីគនោះទេ ហើយខ្ញុំដឹងថា ពួកគេបានត្រៀមខ្លួនរួចរាល់ ដើម្បីទទួលពួកយើង។ ដូច្នេះពួកយើងមិនអាចបាត់បង់ពិន្ទុ ក្នុងការប្រកួតជាមួយពួកគេនោះឡើយ ទោះបីជាមានបញ្ហាអ្វីក៏ដោយ។ ការខិតខំប្រឹងប្រែងរបស់ពួកយើង ក្នុងសប្តាហ៍នេះ នឹងធ្វើឱ្យពួកយើងទទួលបានពិន្ទុ ជាអតិបរមា ដែលយើងចង់បាន»។
ដោយឡែកក្រុមខ្លាំងចំនួន៤ទៀត មានក្រុមកំពុងឈរនៅកំពូលតារាង អង្គរថាយហ្គឺរ ក្រុមលេខ១ ភ្នំពេញក្រោន ក្រុមការពារតំណែងជើងឯក បឹងកេត ដែលកំពុងឈរនៅលេខ៥ រួមទាំងក្រុមព្រះខ័នរាជស្វាយរៀង ដែលឈរនៅលេខ៧ ក៏នឹងត្រូវវប្រកួតប្រជែងដណ្តើមយក៣ពិន្ទុ នៅថ្ងៃសៅរ៍ និងថ្ងៃអាទិត្យ នេះដែរ ហើយក្រុមទាំង៤នេះ ត្រូវបានគេមើលឃើញថា សុទ្ធតែមានភាពរយខ្ពស់ ក្នុងការទទួលបានជ័យជម្នះដូចគ្នា។
ការវាយតម្លៃបែបនេះ ក៏ព្រោះតែក្រុមខ្លាំងទាំង៤ ខាងលើ ត្រូវតែជួបក្រុមដែលមានកម្រិតលេងទាបជាងខ្លួន ជាពិសេសក្រុមអង្គរថាយហ្គឺរ ដែលពួកគេ នឹងទទួលបានជ័យជម្នះ ដោយគ្មានអ្វីត្រូវសង្ស័យ នោះឡើង ដើម្បីពង្រឹងទីតាំងកំពូលតារាងរបស់ខ្លួន ដ្បិតអីលើកនេះ អង្គរថាយហ្គឺរ ត្រូវជួបក្រុមប្រើកីឡាករខ្មែរសុទ្ធ អគ្គិសនីកម្ពុជា នៅលើទឹកដីខ្លួនឯង៕
