កីឡាករលំដាប់ជើងខ្លាំង ឡុង ជិន និង វេង សុភ័ក្រ បានបង្ហាញពីការខ្លាចរអាគ្នាទៅវិញទៅមក នៅពេលពួកគេ ត្រូវដាក់ឱ្យប្រកួតម៉ារ៉ាតុងដណ្តើមប្រាក់លាន នៅលើសង្វៀនថោន នាថ្ងៃអាទិត្យនេះ ប៉ុន្តែបេក្ខភាព២នាក់ទៀត គឺ ធី វ៉ារិទ្ធ និង ខុន បូឡា បានមិនស្ថិតនៅក្នុងការចាប់អារម្មណ៍របស់គេឡើយ។
បើទោះបីជា ឡុង ជិន កំពុងឡើងជើងជាថ្មី ក្រោយបានយកឈ្នះកីឡាករ សុខ សាវិន ឈ្នះ សូត្រ វាសនា ឈ្នះ អេលីត សាន់ និងឈ្នះ អេលីត ចំរើន សម្រាប់ការប្រកួត៣លើកចុងក្រោយនេះ ប៉ុន្តែ ឡុង ជិន បានចាត់ទុក វេង សុភ័ក្រ ចំពោះរូបគេ។
ឡុង ជិន បានប្រាប់ប្រព័ន្ធផ្សាយថា៖ «សម្រាប់ការប្រកួតដណ្តើមប្រាក់លាន នៅសប្តាហ៍នេះ ឧបសគ្គធំរបស់ខ្ញុំ គឺ វេង សុភ័ក្រ ប៉ុន្តែបើជួប ខុន បូឡា ឬ ធី វ៉ារិទ្ធ វិញ ខ្ញុំសង្ឃឹមឈ្នះ ដោយគ្មានបារម្ភអ្វីឡើយ។ ហេតុនេះបើចាប់ឆ្នោតប៉ះ វេង សុភ័ក្រ ខ្ញុំសង្ឃឹមឈ្នះត្រឹម ៥០ ភាគរយប៉ុណ្ណោះ ប៉ុន្តែក្រៅពីនេះធានាឈ្នះ ៨០ ភាគរយ»។
ចំណែកលោក ឡៅ ស៊ីណាត គ្រូជំនួយ វេង សុភ័ក្រ ក៏បានចាត់ទុក ឡុង ជិន ជាឧបសគ្គរបស់ វេង សុភ័ក្រ ដូចគ្នា។ ស៊ីណាត បាននិយាយថា៖«នៅក្នុងចំណោមអ្នកប្រដាល់ទាំង ៣ នាក់នេះ បេក្ខភាពដែលលំបាកប្រកួតជាងគេ គឺ ឡុង ជិន នេះតែម្តង ចំណែក ធី វ៉ារិទ្ធនិង ខុន បូឡា មិនលំបាកទេ គឺអាចឈ្នះក្នុងទំនុកចិត ៩០ភាគរយ»។
យ៉ាងណាក៏ដោយ អតីតកីឡាករជើងខ្លាំង និងធ្លាប់មានឈ្មោះល្បី ឡៅ ស៊ីណាត នៅតែមានការជឿជាក់ថា វេង សុភ័ក្រ អាចនឹងឈានទៅរកការឈ្នះប្រាក់លាន ចំនួន ៣,៤ លានរៀល ជាថ្មីម្តង។ «តាមខ្ញុំគិតមើល វេង សុភ័ក្រ នឹងឈ្នះប្រាក់រង្វាន់នេះម្តងទៀតមិនខាន ព្រោះវាហាត់បានល្អ ហើយចិត្តប្រកួតរបស់វា វ៉ៃមិនងាយដកថយទេ»។
ចំពោះ លោក ធី ណារីទ្ធ គ្រូបង្វឹក ធី វ៉ារិទ្ធ បានទទួលស្គាល់ថា ឡុង ជិន និង វេង សុភ័ក្រ ពិតជាមានសមត្ថភាពលើសិស្សរបស់ខ្លួន។ លោកនិយាយថា៖«ខ្ញុំមានសង្ឃឹម ៧០ ភាគរយ ប៉ុន្តែ ឡុង ជិន និង វេង សុភ័ក្រ ពិតជាមានសមត្ថភាពខ្លាំង ព្រោះសុទ្ធតែជារៀមច្បង មានបទពិសោធច្រើនជាង លំបាកយកឈ្នះ ហេតុនេះ ការប្រកួតពិតជាតឹងតែងណាស់»៕
