បរទេស៖ លោក Gareth Southgate បានជំរុញឲ្យក្រុមបាល់ទាត់ជម្រើសជាតិអង់គ្លេស ប្រើប្រាស់ការឈឺចាប់ក្នុងការរងបរាជ័យវគ្គផ្តាច់ព្រ័ត្រក្នុងព្រឹត្តិការណ៍ Euro ឆ្នាំ២០២០ ក្រោមស្នាដៃក្រុមបាល់ទាត់ជម្រើសជាតិអ៊ីតាលី យកទៅបំពេញជ័យជម្នះនាថ្ងៃអនាគត ខណៈដែលគ្រូបង្វឹករបស់ក្រុមតោកំណាចទាំង៣រូបនេះបានទទួលយកការស្តីបន្ទោស ចំពោះការរងបរាជ័យដ៏ខកចិត្តដោយសារតែបាល់ប៉េណាល់ទី។
អង់គ្លេស នៅតែមិនអាចឈ្នះពានធំជាលើកទី១របស់ពួកគេ បើគិតចាប់តាំងពីព្រឹត្តិការណ៍ World Cup ឆ្នាំ១៩៦៦ ខណៈដែលខ្សែប្រយុទ្ធ Marcus Rashford ខ្សែបម្រើ Jadon Sancho និង Bukayo Saka សុទ្ធសឹងបានស៊ុតបាល់ប៉េណាល់ទីមិនចូលទី នាកីឡដ្ឋាន Wembley កាលពីថ្ងៃអាទិត្យ។ ក្រុមរបស់លោក Southgate បានចាប់ផ្តើមយ៉ាងល្អ ខណៈដែលខ្សែការពារ Luke Shaw បានជួយឲ្យក្រុមខ្លួនរកបានគ្រាប់បាល់ភ្លាមៗនៅនាទី ទី២ ប៉ុន្តែ អ៊ីតាលី បានបង្ហាញពីភាពរឹងមាំរបស់ខ្លួន ដើម្បីវាយបកវិញតាមរយៈគ្រាប់បាល់តាមស្មើនៅតង់ទី២របស់ Leonardo Bonucci។ នៅពេលដែលឈានដល់ការស៊ុតបាល់ប៉េណាល់ទីកាត់សេចក្តី លោក Southgate បានប្រថុយតាមរយៈការប្តូរ Rashford និង Sancho ឲ្យចូលលេងនៅចិតបញ្ចប់ការប្រកួត ដើម្បីជាប់ជាបេក្ខភាពស៊ុតបាល់ប៉េណាល់ទី។ ការសម្រេចចិត្តនេះ មិនបានផ្តល់ផ្លែផ្កាឡើយ ខណៈដែលអង់គ្លេស នៅតែរងបរាជ័យដោយការស៊ុតបាល់ប៉េណាល់ទីយ៉ាងជូរត់ ក្នុងយុទ្ធនាការធំៗ។
លោក Southgate បានឲ្យដឹងថា៖ «នេះគឺជាការទទួលខុសត្រូវរបស់ខ្ញុំ។ ខ្ញុំបានជ្រើសរើសកីឡាករឲ្យស៊ុតបាល់ប៉េណាល់ទី។ ខ្ញុំប្រាប់កីឡាករថា គ្មានកីឡាកររូបណា មានកំហុសឡើយក្នុងស្ថានភាពបែបនេះ»៕
ប្រភពព័ត៌មាន៖ Channel News Asia
