បរទេស៖ ខ្សែប្រយុទ្ធ Marcus Rashford របស់ក្លិប Manchester United អាចនឹងអវត្តមានរហូតដល់រយៈពេល៣ខែ ក្រោយពីសម្រេចចិត្តវះកាត់ទៅលើបញ្ហាស្មាររបស់គេ បន្ទាប់ពីព្រឹត្តិការណ៍ Euro ឆ្នាំ២០២០។
នេះបើយោងទៅតាមប្រភពព័ត៌មាននានា កាលពីថ្ងៃអង្គារ។ Rashford វ័យ២៣ឆ្នាំ បានទទួលការស្កេនកាលពីព្រឹកថ្ងៃអង្គារ នៅបញ្ហាស្មារ ដែលបានរំខានដល់ខ្សែប្រយុទ្ធរូបនេះ បើគិតចាប់តាំងពីចុងរដូវកាលមុន។ នេះបើយោងទៅតាមបណ្តាញសារព័ត៌មាន Daily Telegraph និង BBC។ រូបគេអាចនឹងទទួលការវះកាត់នៅចុងខែកក្កដានេះ។ Rashford បានបង្ហាញខ្លួន៥លើកសម្រាប់ក្រុមបាល់ទាត់ជម្រើសជាតិអង់គ្លេស ក្នុងព្រឹត្តិការណ៍ Euro ឆ្នាំ២០២០ និងបានស៊ុតបាល់ប៉េណាល់ទីមិនចូលទី ក្នុងពេលចាញ់ក្រោមស្នាដៃក្រុមជម្រើសជាតិអ៊ីតាលី ក្នុងវគ្គផ្តាច់ព្រ័ត្រ។ នៅថ្ងៃដដែលនោះ ក្រុមបាតុករប្រឆាំងនឹងការរើសអើងជាតិសាសន៍ បានប្រមូលផ្តុំគ្នាពីមុខផ្ទាំងរូបភាពរបស់ Rashford ក្នុងទីក្រុង Manchester ក្រោយពីរូបភាពនេះ ត្រូវបានគូសឲ្យខូចទ្រង់ទ្រាយដើម ពីក្រុមរើសអើងជាតិសាសន៍ប្រឆាំងនឹងកីឡាករអង់គ្លេស។
ក្រុមប្រឆាំងនឹងការរើសអើងជាតិសាសន៍ បានប្រមូលផ្តុំគ្នានៅពីមុខផ្ទាំងរូបលើជញ្ជាំងដែលត្រូវបានគូសឲ្យខូចមុខមាត់នោះ ខណៈដែល Rashford និងមិត្តរួមក្រុមដែលមានស្បែកខ្មៅរបស់គេគឺ Jadon Sancho និង Bukayo Saka បានក្លាយជគោលដៅវាយប្រហារលើបណ្តាញសង្គម ដោយសារតែក្រុមអង់គ្លេស រងបរាជ័យក្រោមស្នាដៃក្រុមជម្រើសជាតិអ៊ីតាលី៕
ប្រភពព័ត៌មាន៖ Channel News Asia
