ក្រុមមានមូលដ្ឋាននៅខេត្តតាកែវ គិរីវង់សុខសែនជ័យ បានព្យាយាមបំភ្លេចចោល ចំពោះការចាញ់ក្រុមបឹងកេត ១-០ កាលពីថ្ងៃសៅរ៍ ដើម្បីពង្រឹងទាំងស្មារតី និងឆន្ទៈ សម្រាប់ផ្តោតមកលើការស្វាគមន៍ក្រុមកងយោធពលខេមរភូមិន្ទ (ទ័ព) នៅកីឡដ្ឋានរបស់ខ្លួន នារសៀលម៉ោង ៣:៣០ ថ្ងៃពុធនេះ។
អគ្គលេខាធិការរងក្លិបគិរីវង់សុខសែនជ័យ លោក ឯម តារា បានទម្លាយឱ្យដឹងថា ទាំងរូបលោកផ្ទាល់ ក្រុមកីឡាករ និងក្រុមគ្រូបង្វឹក ពិតជាពិបាកទទួលយក និងមានការសោកស្តាយមិនទាន់បាត់ទេ សម្រាប់ការចាញ់ក្រុមម្ចាស់ផ្ទះ បឹងកេត ១-០ កាលពីចុងសប្តាហ៍មុននេះ ព្រោះការប្រកួតនោះ ក្រុមគិរីវង់ មានការជឿជាក់ថា នឹងឈ្នះបាន៣ពិន្ទុ គឺយ៉ាងហោចណាស់ ក៏បានត្រឹមស្មើដែរ ប៉ុន្តែជិតចប់ការប្រកួតទៅហើយនោះ ពោលគឺនៅក្នុងនាទីទី ៩០+៦ ខ្សែប្រយុទ្ធទើបប្តូរឱ្យចូលលេង ឱ ភារុណ បែរជាអាចទម្លុះសំណាញ់ទីរបស់ក្រុមគិរីវង់ បាន នាំឱ្យ បឹងកេត ឈ្នះ៣ពិន្ទុទាំងវេទនា។
យ៉ាងណាក៏ដោយ លោក ឯម តារា បានឱ្យដឹងទៀតថា ពេលនេះ នៅក្នុងក្រុមទាំងមូល បានសង្រួបសង្រួមចិត្តមកវិញ ដើម្បីផ្តោតលើការប្រកួត នៅថ្ងៃពុធនេះ ដោយពួកគេបានប្តេជ្ញាចិត្តធ្វើយ៉ាងណា ដណ្តើមឱ្យបាន៣ពិន្ទុពីក្រុមទ័ព ដើម្បីបំពេញការខកចិត្ត ចំពោះការចាញ់ក្រុមបឹងកេត កាលពីថ្ងៃសៅរ៍នោះ។
រំឭកទៅដល់ការប្រកួតនេះ លោក ឯម តារា អគ្គលេខាធិការរងក្លិបគិរីវង់សុខសែនជ័យ បានប្រាប់កាលពីថ្ងៃអង្គារថា៖ «ការចាញ់ក្រុមបឹងកេត កន្លងមកនេះ គឺជាលទ្ធផលដ៏គួរសោកស្តាយ និងខកចិត្តខ្លាំងបំផុត ដែលយើងពិបាកនឹងទទួលយក ហើយក៏បានធ្វើឱ្យប៉ះពាល់ដល់អារម្មណ៍របស់កីឡាករ និងគ្រូបង្វឹកមួយចំនួនផងដែរ ប៉ុន្តែយើងបានគិត និងសង្រួបសង្រួមចិត្តមកវិញ ដើម្បីផ្តោតទៅលើការជួបក្រុមទ័ព នៅថ្ងៃពុធនេះ»។
អគ្គលេខាធិការរងរូបនេះ បានបញ្ជាក់ថា៖ «យើងនឹងព្យាយាមធ្វើឱ្យបានល្អបំផុត ដើម្បីដណ្តើមយក៣ពិន្ទុមកវិញ។ អ្វីដែលសំខាន់នោះ គឺឆន្ទៈ និងទឹកចិត្តរបស់កីឡាករ និងក្រុមការងារទាំងអស់ គឺនៅតែមានបន្ត ដោយយើងនឹងប្រឹងប្រែង ហើយប្តេជ្ញាចិត្តថា នឹងព្យាយាមយកឱ្យបាន៣ពិន្ទុ សម្រាប់ការប្រកួតជាមួយក្រុមទ័ព នៅថ្ងៃពុធនេះ»។
យ៉ាងណាក៏ដោយ គេនៅមិនទាន់ដឹងថា ក្រុមម្ចាស់ផ្ទះគិរីវង់សុខសែនជ័យ អាចនឹងយកឈ្នះក្រុមទ័ព ដើម្បីបំពេញតាមការចង់បានរបស់ខ្លួន ឬយ៉ាងណានោះទេ ព្រោះទ័ព ក៏បានដាក់ចិត្ត ដណ្តើមឱ្យបាន៣ពិន្ទុត្រឡប់ទៅផ្ទះវិញ ដូចគ្នា ខណៈការជួបគ្នាត្រឹម១លើក កាលពីរដូវកាលឆ្នាំ២០២០ ទ័ព បានយកឈ្នះ ក្រុមគិរីវង់ នៅកីឡដ្ឋានគិរីវង់ ក្នុងខេត្តតាកែវនេះតែម្តង។
លោក ហោ សុខហេង បាននិយាយថា៖ «សម្រាប់ការប្រកួតជាមួយក្រុមគិរីវង់សុខសែនជ័យ ថ្ងៃពុធនេះ យើងគិតថា ជាការប្រកួតមួយ ដែលមានភាពតានតឹងបន្តិច ព្រោះយើងបានឃើញថា
