បរទេស៖ ក្លិប Barcelona បានឈានដល់ការព្រមព្រៀងគ្នាមួយជាមួយនឹង Leonel Messi ដើម្បីឲ្យតារាឆ្នើមជើងចាស់អន្តរជាតិអាហ្សង់ទីនរូបនេះ បន្តនៅជាមួយនឹងក្លិប Bara ក្នុងរយៈពេល៥ឆ្នាំទៀត ប៉ុន្តែ ត្រូវកាត់ប្រាក់ខែ។ នេះបើយោងទៅតាមការចេញផ្សាយរបស់សារព័ត៌មានអេស្ប៉ាញ កាលពីថ្ងៃពុធ។
Messi ដែលកាលពីដើមខែនេះ បានឈ្នះពានអន្តរជាតិជាមួយនឹងក្រុមជម្រើសជាតិអាហ្សង់ទីន នៅពេលដែលពួកគេបានផ្តួលក្រុមជម្រើសជាតិប្រេស៊ីល ដើម្បីឈ្នះពាន Copa America នោះ នឹងចុះកិច្ចសន្យារយៈពេល៥ឆ្នាំ ជាមួយនឹងលក្ខខណ្ឌរំលាយកិច្ចសន្យាចំនួន៦០០លានអឺរ៉ូ (ស្មើនឹង៧០៩លានដុល្លារអាមេរិក)។ នេះបើយោងទៅតាមកាសែតកីឡាប្រចាំថ្ងៃ L’Esportiu។ កាសែតកីឡា Marca ដែលបានបញ្ជាក់ពីប្រភពព័ត៌មានរបស់ L’Esportiu នោះ បានចេញផ្សាយថា៖ «កីឡាកររូបនេះ នឹងកាត់ប្រាក់ខែ៥០%។ បច្ចុប្បន្ន ភាគីទាំង២រង់ចាំតែមេធាវី ពិនិត្យលើកិច្ចសន្យា និងបោះត្រាយល់ព្រមប៉ុណ្ណោះ។
នៅពេលដែលការយល់ព្រមនេះ កើតឡើង ការបន្តនៅរបស់គេ នឹងក្លាយជាផ្លូវការ»។ បើយោងទៅតាមកាសែត L’Esportiu កីឡាករ Messi វ័យ៣៤ឆ្នាំ នឹងទទួលបានចំណូលជាមូលដ្ឋាន២០លានអឺរ៉ូ នៅរដូវកាលក្រោយជាមួយនឹងក្លិប Barca ដែលរូបគេបានជួយឲ្យឈ្នះពានលីក១០លើក និងពានក្របខ័ណ្ឌ Champions League ៤លើក៕
ប្រភពព័ត៌មាន៖ Channel News Asia
