បរទេស៖ ក្លិប Paris Saint-Germain បានបញ្ជាក់កាលពីថ្ងៃពុធថា ពួកគេបានបំពេញការចុះហត្ថលេខាជាមួយអ្នកចាំទីអន្តរជាតិអ៊ីតាលី Gianluigi Donnarumma ក្នុងកិច្ចសន្យារយៈពេល៥ឆ្នាំ។
អ្នកចាំទីដ៏ឆ្នើមប្រចាំ Euro ឆ្នាំ២០២០វ័យ២២ឆ្នាំរូបនេះ ដែលបានសង្គ្រោះបាល់ប៉េណាល់ទី២គ្រាប់ ក្នុងការប្រកួតវគ្គផ្តាច់ព្រ័ត្រ និងជាប់ជាកីឡាករឆ្នើមប្រចាំងយុទ្ធនាការនោះ ចូលរួមជាមួយនឹងក្លិបរបស់បារាំង ដោយគ្មានតម្លៃខ្លួន (Free agent) ឡើយ ពីក្លិប AC Milan។ Donnarumma នឹងត្រូវធ្វើការប្រជែងជាមួយនឹងអ្នកចាំទីពោរពេញដោយបទពិសោធ Keylor Navas ដើម្បីដណ្តើមយកតំណែងក្នុងជម្រើសទាំង១១នាក់ដំបូង។
Donnarumma បានឲ្យដឹងក្នុងសេចក្តីថ្លែងការណ៍មួយ ដែលត្រូវបានចេញផ្សាយដោយក្លិប PSG ថា៖ «ខ្ញុំពិតជារីករាយណាស់ក្នុងការស្ថិតជាផ្នែកមួយរបស់ក្លិបដ៏ធំនេះ។ ខ្ញុំត្រៀមខ្លួនរួចរាល់ ក្នុងកាចាប់ផ្តើមការប្រជែងថ្មីនេះ និងបន្តអភិវឌ្ឍនៅទីនេះ។ ជាមួយនឹង Paris ខ្ញុំចង់ឈ្នះឲ្យបានច្រើនតាមដែលអាច និងនាំយកការរីករាយទៅកាន់អ្នកគាំទ្រ»។ អំឡុងរយៈពេល៦ឆ្នាំ ជាមួយនឹងក្លិប AC Milan អ្នកចាំទីរូបនេះ បានបង្ហាញខ្លួនក្នុងក្របខ័ណ្ឌ Serie A ២១៥លើក ក្របខ័ណ្ឌ Europa League ១៦លើក និងពាន Italian Cup ១២លើក៕