អ្នកប្រដាល់មកពីជាយដែន សុខ រិទ្ធ ដែលកំពុងហ្វឹកហាត់ នៅក្នុងក្រុមជម្រើសជាតិប្រដាល់ឃីកបុកស៊ីង បាននឹងកំពុងផ្តោតខ្លាំងទីលើការជួបកីឡាករ យ៉ន ពិសី ក្នុងការប្រកួត Mas Fight មាន៩នាទីពេញ នៅលើសង្វៀន ថោន នាថ្ងៃអាទិត្យនេះ ខណៈបេក្ខភាពវ៉ៃម៉ារ៉ាតុងដណ្តើមប្រាក់លាន នៅសប្តាហ៍នេះ សុទ្ធតែជាអ្នកប្រដាល់ជើងថ្មី វ័យក្មេង ដែលស្រេកឃ្លានការឈ្នះ។
ចំពោះអត្ថន័យនៃការជួបគ្នារវាង សុខ រិទ្ធ និង យ៉ន ពិសី លើកនេះ វាមិនត្រឹមតែជាការប្រកួត ដណ្តើមយកជ័យជម្នះ តាមរយៈការផ្តួលគ្នាឱ្យសន្លប់ ដើម្បីទទួលបានប្រាក់រង្វាន់លើកចិត្តបន្ថែមពីកម្មវិធីប៉ុណ្ណោះទេ ប៉ុន្តែអ្នកទទួលបានជ័យជម្នះ នឹងទទួលបានឱកាស ប្រកួតសងសឹកជាមួយជើងខ្លាំង សែន រ៉ាដេត ព្រោះអ្នកទាំង២នេះ សុទ្ធតែធ្លាប់ចាញ់ សែន រ៉ាដេត ដូចគ្នា។
យ៉ាងណាក៏ដោយ សុខ រិទ្ធ ពិតជាចង់ឈ្នះ យ៉ន ពិសី ខ្លាំងណាស់ ព្រោះក្រៅពីបានទៅប្រកួតសងសឹក សែន រ៉ាដេត គឺជ័យជម្នះនេះ ក៏អាចនឹងស្តារមុខមាត់របស់គេ ឡើងវិញបានដែរ ព្រោះ២ប្រកួតចុងក្រោយនេះ សុខ រិទ្ធ បានចាញ់ រិន ដាវីដ និងចាញ់ សែន រ៉ាដេត យ៉ាងគ្រាំគ្រា។ សុខ រិទ្ធ បានស្នើសុំប្រកួតសងសឹកវិញ ប៉ុន្តែគណៈកម្មការផ្គូផ្គងរបស់សង្វៀនថោនបានដាក់ឱ្យ ជួប យ៉ន ពិសី សិន គឺបើឈ្នះទើបអាចបានសងសឹក សែន រ៉ាដេត។
ទាក់ទងការប្រកួតនេះ សុខ រិទ្ធ ប្រាប់ប្រព័ន្ធផ្សព្វផ្សាយថា៖ «ការប្រកួតលើកនេះ ខ្ញុំនឹងធ្វើឱ្យបានល្អ គឺប្រកួតយកឈ្នះ យ៉ន ពិសី ឱ្យបាន ដើម្បីបានឡើងទៅប្រកួតសងសឹកជាមួយ សែន រ៉ាដេត នៅថ្ងៃក្រោយ។ តែទោះបីជាយ៉ាងណា ខ្ញុំមិនហ៊ានអះអាងពីការឈ្នះលើ យ៉ន ពិសី ប៉ុន្មានភាគរយនោះទេ តែខ្ញុំនឹងខំប្រកួតឱ្យបានល្អ និងអស់ពីសមត្ថភាព ព្រោះខ្ញុំបានហ្វឹកហាត់ត្រៀមគ្រប់គ្រាន់ហើយ»។
យ៉ាងណាក៏ដោយ ភាគីកីឡាករ យ៉ន ពិសី ក៏រំពឹងទទួលបានជ័យជម្នះ ក្នុងការប្រកួតនេះផងដែរ។ ចំណែកលោក ឡុង សាលវ័ន្ត គ្រូបង្វឹក យ៉ន ពិសី បាននិយាយថា៖ «ពិសី ហាត់បានល្អ ហើយការវ៉ៃតាមរបៀប Mas Fight នេះ ពិសី មានទំនុកចិត្តខ្ពស់ ព្រោះរបៀបវ៉ៃរបស់វា សម្រុកខ្លាំង អ៊ីចឹងអាចមានឱកាសផ្តួល សុខ រិទ្ធ ឱ្យសន្លប់បាន ក្នុងនាទីណាមួយ»។
លោក ជួប វុត្ថា អ្នកផ្គូផ្គងប្រចាំសង្វៀនថោនបាននិយាយថា៖ «អ្នកទាំង ២ សុទ្ធតែធ្លាប់ចាញ់ សែន រ៉ាដេត អ៊ីចឹងអ្នកណាឈ្នះក្នុងជំនួបនេះ នឹងបានឡើងទៅប្រកួតសងសឹកជាមួយ សែន រ៉ាដេត នៅសង្វៀនថោននេះ ដែលត្រៀមចាំរួចរាល់»។
យ៉ាងណាមិញ សម្រាប់បេក្ខភាពត្រូវប្រកួតម៉ារ៉ាតុងដណ្តើមប្រាក់លាន ចំនួន ៣,៤លានរៀល នៅថ្ងៃអាទិត្យ សុទ្ធតែជាអ្នកប្រដាល់ជើងថ្មី វ័យក្មេង កំពុងសាងបានភាពល្បី ដោយក្នុងនោះមាន ពុទ្ធ ម៉ាណូយ, ឡុង ខេត្ត, សឿន ថៃសាន់ និង សូដា លីម៉ូ។
រវាងអ្នកទាំង៤នេះ នឹងត្រូវធ្វើការចាប់ឆ្នោត នៅមុនការប្រកួតជម្រុះ៣ទឹក រួចទើបយកអ្នកឈ្នះឡើងទៅប្រកួតវគ្គផ្តាច់ព្រ័ត្រ។ ទោះយ៉ាងណា សម្រាប់អ្នកទាំង៤នេះ មានសមត្ថភាពប្រហាក់ប្រហែលគ្នា គ្រាន់តែ សូដា លីម៉ូ ហាក់ខ្ចីជាងគេបន្តិច តែអ្វីដែលគួរឱ្យកត់សម្គាល់នេះ ពួកគេ សុទ្ធជាអ្នកប្រយុទ្ធវ៉ៃមិនរាថយ ពិសេស ឡុង ខេត្ត និង សឿន ថៃសាន់ ដែលនិយមវាយសម្រុកទៅលើដៃគូប្រកួត ហើយបើទប់មិនជាប់ អ្នកនោះអាចនឹងសន្លប់បាន៕