បរទេស៖ ខ្សែប្រយុទ្ធអន្តរជាតិបារាំង Olivier Giroud របស់ក្លិប Chelsea បានបំពេញការផ្ទេររបស់គេទៅកាន់ក្លិប AC Milan ហើយ។
នេះបើងយោងទៅតាមការប្រកាសរបស់ក្លិបអ៊ីតាលីមួយនេះ កាលពីថ្ងៃសៅរ៍។ សមាជិកឈ្នះពាន World Cup វ័យ៣៤ឆ្នាំរូបនេះ បានទទួលការត្រួតពិនិត្យសុខភាព កាលពីថ្ងៃសុក្រ នៅមុនពេលចុះហត្ថលេខាជាមួយនឹងក្រុមម្ចាស់ជើងឯករងនៃក្របខ័ណ្ឌ Serie A មួយនេះ ដែលបានវិលទៅកាន់ក្របខ័ណ្ឌ Champions League វិញនារដូវកាលក្រោយនេះ បន្ទាប់ពីអវត្តមានអស់រយៈពេល៧ឆ្នាំ។ ក្លិបបានឲ្យដឹងក្នុងសេចក្តីថ្លែងការណ៍មួយ ដោយមិនបានផ្តល់ព័ត៌មានលម្អិតទៅលើរយៈពេលក្នុងកិច្ចសន្យា ដែលបណ្តាញសារព័ត៌មានអ៊ីតាលី បានចេញផ្សាយថា មានរយៈពេល២ឆ្នាំ ថា៖ «ក្លិប AC Milan ពិតជារីករាយណាស់ក្នុងការប្រកាសពីការចុះហត្ថលេខាជាមួយនឹងខ្សែប្រយុទ្ធ Olivier Jonathan Giroud ជាអចិន្ត្រៃយ៍ពីក្លិប Chelsea។ ខ្សែប្រយុទ្ធអន្តរជាតិបារាំងរូបនេះ នឹងពាក់អាវលេខ៩»។
ក្លិប Chelsea បានបន្តកិច្ចសន្យារបស់ Giroud កាលពីខែមុន រយៈពេល១ឆ្នាំទៀតរហូតដល់ខែមិថុនា ឆ្នាំ២០២២ ប៉ុន្តែរូបគេចង់ចាកចេញពីកីឡដ្ឋាន Stamford Bridge ក្រោយពីធ្លាក់ចេញពីការអារម្មណ៍ ដោយរូបគេបានបង្ហាញខ្លួនក្នុងជម្រើសដំបូងនៃក្របខ័ណ្ឌ Premier League ត្រឹមតែ៨លើកគត់។ Giroud បានសរសេរនៅលើ Twitter ថា៖ «ជូនចំពោះក្លិបតោខៀវ មិត្តរួម និងគ្រូបង្វឹកទាំងអស់ ក៏ដូចជាក្លិបទាំងមូល សូមថ្លែងអំណរគុណធំៗដល់អ្នកចំពោះពេលវេលាដ៏ពិសេសនេះ ដោយខ្ញុំកំពុងចាប់ផ្តើមដំណើរថ្មីនេះជាមួយនឹងភាពរីករាយ»៕
ប្រភពព័ត៌មាន៖ Channel News Asia
