បរទេស៖ ខ្សែប្រយុទ្ធ Jadon Sancho បានយល់ព្រមនូវកិច្ចព្រមព្រៀងជាមួយនឹងក្លឹបបិសាចក្រហម Manchester United តាំងពីដើមខែកក្កដា ប៉ុន្តែមកទល់នឹងពេលនេះក្លឹបនៅមិនទាន់បានប្រកាសជាផ្លូវការណ៍អំពីការមកដល់របស់ខ្សែប្រយុទ្ធស្លាបរូបនេះនៅឡើយទេ។
អ្នកចាត់ទូទៅលោក Ole Gunnar Solskjaer បានបង្ហើបនៅសល់ឯកសារមួយចំនួនដែលនឹងត្រូវសម្រេចមុននឹងប្រកាសជាផ្លូវការណ៍ថា Jadon Sancho គឺសមាជិកថ្មីរបស់ពួកគេ។ ក្លឹប Manchester United បានបញ្ចាក់កាលពីដើមខែនេះថាខ្សែប្រយុទ្ធស្លាបសញ្ជាតិអង់គ្លេសរូបនេះនឹងផ្ទេរមកកាន់ទឹកដី Old Trafford ពីក្លឹប Borussia Dortmund ក្នុងតម្លៃខ្លួន៧២.៩លានផោន។ អ្នកគាំទ្រក្លឹប Manchester United កំពុងតែមានការអន្ទះសារចង់ក្លឹបរបស់ខ្លួនប្រកាសជាផ្លូវការណ៍អំពីការចុះកុងត្រាលើ Sancho ប៉ុន្តែរហូតមកទល់នេះក្លឹបនៅមិនទាន់បានប្រកាសនៅឡើយទេ។
លោក Ole Gunnar Solskjaer បាននិយាយបន្ទាប់ពីក្លឹប Manchester United យកឈ្នះលើ Derby County ក្នុងការប្រកួតមិត្តភាពកាលពីយប់ថ្ងៃអាទិត្យថា៖ «អ្វីដែលខ្ញុំដឹងនៅពេលនេះគឺនៅសល់ឯកសារមួយចំនួនទៀតដែលនឹងត្រូវបញ្ចប់, វាមិនច្រើនទេ គ្រាន់តែជាព័ត៌មានលម្អិតបន្តិចបន្តួចប៉ុណ្ណោះ ហើយសង្ឃឹមថាពួកយើងនឹងអាចប្រកាសជាផ្លូវការណ៍នាពេលឆាប់ៗខាងមុខនេះ»៕
ប្រភពព័ត៍មាន៖ Mirrors
