កីឡាករ ប្រាក់ ធីវ៉ា របស់ក្រុមភ្នំពេញក្រោន និងខ្សែប្រយុទ្ធនីហ្សេរីយ៉ា Ajayi Opeyemi Korede របស់ក្រុមវិសា បានក្លាយជាបេក្ខភាពទី៥ និងទី៦ បន្ធាប់ពីខ្សែប្រយុទ្ធ Haber Marcus របស់ក្រុមវិសាខា (រកបាន៤គ្រាប់) ព្រមទាំងខ្សែប្រយុទ្ធ ចាន់ វឌ្ឍនាកា របស់បឹងកេត ខ្សែប្រយុទ្ធ Abee របស់អាស៊ីអឺរ៉ុប និងខ្សែប្រយុទ្ធប្រេស៊ីល Marcio របស់ណាហ្គាវើលដ៍ ដែលអាចរកបាន៣គ្រាប់ ក្នុង១ប្រកួត សម្រាប់ការប្រកួតលីគកំពូលកម្ពុជា ឆ្នាំ២០២១។
ការធ្វើបានហែតទ្រីករបស់ ប្រាក់ ធីវ៉ា បានកើតមានឡើង នៅពេលក្រុមភ្នំពេញក្រោន បានលត់ក្រុមប្រើកីឡាករខ្មែរសុទ្ធ អគ្គិសនីកម្ពុជា ៦-០ នៅកីឡដ្ឋាន RSN របស់ខ្លួន កាលពីថ្ងៃអាទិត្យ ខណៈ៣គ្រាប់ទៀតរកបានដោយខ្សែប្រយុទ្ធ Matheus ២គ្រាប់ និងខ្សែបម្រើប្រយុទ្ធ Nieto ១គ្រាប់។
ជាមួយការឈ្នះ៣ពិន្ទុពីក្រុមអគ្គិសនីកម្ពុជានេះ បានជួយឱ្យក្រុមភ្នំពេញក្រោន បានឡើងទៅឈរនៅលេខរៀងទី៣ ជាថ្មី បន្ទាប់ពីតំណែងមួយនេះ បានធ្លាក់ទៅលើក្រុមកងយោធពលខេមរភូមិន្ទ (ទ័ព) កាលពីសប្តាហ៍មុន ប៉ុន្តែការប្រកួតកាលពីថ្ងៃអាទិត្យ ម្សិលមិញដែរ ទ័ព បានចាញ់ក្រុមបឹងកេត ២-០។
ចំណែកខ្សែប្រយុទ្ធនីហ្សេរីយ៉ា Ajayi Opeyemi Korede នៅតែដើរតួនាទីយ៉ាងសំខាន់ ក្នុងការជួយដល់ក្រុមវិសាខា រកបានជ័យជម្នះ ដោយការប្រកួត កាលពីថ្ងៃអាទិត្យនោះ រូបគេរកបាន៣គ្រាប់ ស្របពេលប្រធានក្រុម កែវ សុខផេង រកបាន២គ្រាប់ ដើម្បីជួយឱ្យ វិសាខា យកឈ្នះក្រុមសូលទីឡូអង្គរ ៥-០។
ជាមួយការយកឈ្នះក្រុមសូលទីឡូអង្គរ ៥-០ នេះ ក្រុមវិសាខា ក៏បានបង្កើតកំណត់ត្រាថ្មីមួយទៀតផងដែរ ដោយពួកគេប្រើពេលត្រឹម១៤នាទី ដើម្បីបានគ្រាប់បាល់សរុបរហូតដល់៥គ្រាប់ គឺមានន័យថា ទាំងគ្រប់បាល់របស់ Ajayi និង កែវ សុខផេង គឺបានកើតមានឡើងចន្លោះនាទីទី៦៨ ដល់ទី ៨២។
តាមរយៈការឈ្នះបាន៣ពិន្ទុបន្ថែមនេះដែរ វិសាខា មិនត្រឹមតែអាចពង្រឹងទីតាំងលេខ២របស់ពួកគេប៉ុណ្ណោះទេ ប៉ុន្តែក្រុមមួយនេះ ក៏មានឱកាសកាន់តែកៀក ក្នុងការឈានទៅប្រជែងយកលេខ១ ពីក្រុមអង្គរថាយហ្គឺរ ផងដែរ ព្រោះពេលនេះ វិសាខា មានពិន្ទុតិចជាង អង្គរថាយហ្គឺរ ត្រឹម១ពិន្ទុប៉ុណ្ណោះ គឺ១៩ ទល់នឹង១៨ពិន្ទុ ហេតុនេះបើសិន អង្គរថាយហ្គឺរ ភ្លាត់ស្មើ ឬចាញ់តែ១ប្រកួ វិសាខា នឹងអាចប្រជែងយកទីតាំងកំពូលតារាងនេះ បានជាមិនខាន៕
