ខ្សែប្រយុទ្ធ ចាន់ វឌ្ឍនាកា បានក្លាយជាវីរបុរសជាថ្មីម្តងទៀត ក្នុងការជួយឱ្យក្រុមបឹងកេត ទទួលបានជ័យជម្នះយ៉ាងរំភើប លើក្រុមម្ចាស់ផ្ទះ ព្រះខ័នរាជស្វាយរៀង ចំណែកក្រុមវិសាខា ក៏បានយកឈ្នះលើក្រុមសិស្សប្អូន ខេត្តព្រៃវែង ផងដែរ ប៉ុន្តែណាហ្គាវើលដ៍ បានជួបការសោកស្តាយ ខណៈពួកគេមិនអាចរកការមានប្រៀបរបស់ខ្លួនលើក្រុមម្ចាស់ផ្ទះ ភ្នំពេញក្រោន រហូតដល់ចប់ការប្រកួតនោះ។
តាមរយៈការប្រកួត កាលពីយប់ថ្ងៃអាទិត្យ ម្សិលមិញនេះ ខ្សែប្រយុទ្ធ Privat រកបានគ្រាប់បាល់នាំមុខឱ្យក្រុមស្វាយរៀង នាំមុខ តាំងពីនាទីទី១៥ ប៉ុន្តែការស៊ុតបាល់ចេញពីចំហៀងរបស់ ចាន់ វឌ្ឍនាកា ដែលគេមើលឃើញថា គ្រាន់តែជាការលើកបាល់បន្តឱ្យទៅមិត្តរួមក្រុមនោះ តែបែរជាបាល់នោះ ហោះកោង ប៉ះបង្គោលដៃ រួចភ្លាតចូលទី ដែលសូម្បីអ្នកចាំទី អាំ សុវណ្ណារ៉ាត់ របស់ក្រុមស្វាយរៀង ក៏នឹកស្មានមិនដល់ ហើយក៏មិនបានលើកទៅសង្រ្គោះបាល់នោះដែរ។
បន្ថែមទៅលើការរកបានគ្រាប់បាល់តាមស្មើឱ្យក្រុមបឹងកេត នៅនាទីទី ៤៤ នេះ ចាន់ វឌ្ឍនាកា បានបង្កើតរឿងដ៏សែនរំភើបសម្រាប់ក្រុមទាំងមូល ដោយរូបគេបានស៊ុតបាល់ចេញពីការលោតដោលចេញរបស់ អាំ សុវណ្ណារ៉ាត់ បញ្ចូលទីយ៉ាងស្រួល គឺបាល់នោះ បានរត់កាត់ក្រោមជើងអ្នកចាំទី សុវណ្ណារ៉ាត់ តែម្តង នៅនាទីទី ៩០+៤។
ជាមួយគ្រាប់បាល់ជ័យជម្នះចុងក្រោយនេះ បានជួយឱ្យក្រុមបឹងកេត ហក់ពីលេង៥ ទៅ ឈរនៅលេខ២ ជាបណ្តោះអាសន្ន ហើយជាមួយជ័យជម្នះដ៏មិនគួរឱ្យនឹកស្មានដល់ គឺកើតឡើង នៅនាទីទី ៩០+៤ នេះ ចាន់ វឌ្ឍនាកា បានសរសេរបង្ហោះនៅលើផេចហ្វេសប៊ុករបស់ខ្លួនថា៖ «បាល់ទាត់ គឺបែបនេះ ទាល់តែលឺកញ្ចែរបញ្ចប់ការប្រកួត ទើបដឹងឈ្នះចាញ់! អរគុណក្រុម ដែលសហការគ្នាបានយ៉ាងល្អ និងសូមផ្ញើបីពិន្ទុនេះ ជូនអ្នកគាំទ្រទាំងអស់គ្នា»។
ជាមួយគ្នានេះ ក្រុមវិសាខា បានយកឈ្នះក្រុមសិស្សប្អូន ដែលជ្រកក្រោមដំបូលគ្រប់គ្រងតែមួយ គឺ ខេត្តព្រែវែង ក្នុងលទ្ធផល ៣-២ ដោយក្នុងនោះខ្សែប្រយុទ្ធមានកម្ពស់ Haber Marcus រកបាន២គ្រាប់ នៅនាទីទី ៣៦ និងទី៧០ ខណៈ១គ្រាប់ទៀតរកបានដោយ កែវ សុខផេង នៅនាទីទី៨៣ រីឯ២គ្រាប់របស់ក្រុមខេត្តព្រៃវែង រកបានដោយ វឿន វ៉ា នៅនាទីទី៤៩ និង គី រីណា នៅនាទីទី៩០។
តាមរយៈការរកបាន៣ពិន្ទុបន្ថែមទាំងលំបាកនេះ ក្រុមវិសាខា បានទទួលជោគជ័យ ទៅតាមការគ្រោងទុករបស់ខ្លួន ក្នុងការដណ្តើមបានទីតាំងលេខ១ ពីក្រុមអង្គរថាយហ្គឺរ។ នៅក្រោយការទទួលបានជ័យជម្នះនេះ ក្លិបវិសាខា បានសរសេរបង្ហោះ នៅលើផេចហ្វេសប៊ុករបស់ខ្លួនថា៖ «អ្វី ដែលពួកយើងចង់បាន (តំបន់កំពូល)! ពួកយើងប្ដេជ្ញា នឹងបន្ដការខិតខំប្រឹងប្រែងបន្ថែមទៀត ដើម្បីរក្សាកៅអីកំពូលតារាង និងឆ្ពោះទៅសម្រេចគោលដៅរបស់ពួកយើងទាំងអស់គ្នា»។
ផ្ទុយពីនេះក្រុមណាហ្គាវើលដ៏ ដែលស្ទើរតែរកបានជ័យជម្នះលើក្រុមម្ចាស់ផ្ទះ ភ្នំពេញក្រោន ទៅហើយ តាមរយៈការរកបានគ្រាប់បាល់របស់ ឃីម បូរី តាំងពីនាទីទី ៤៥+៣ នោះ គឺបានជួបការខកចិត្តនៅចុងម៉ោង ខណៈពួកគេ មិនអាចការពារការនាំមុខនេះ រហូតដល់ ចប់ការប្រកួតនោះ។
ក្រុមរបស់លោក មាស ចាន់ណា បានចុះមកលេងនៅតំបន់ការពារស្ទើរតែទាំងអស់ ដើម្បីទប់ការវាយលុកយ៉ាងខ្លាំងក្លារបស់ ភ្នំពេញក្រោន ប៉ុន្តែការស៊ុតពីចម្ងាយរបស់ខ្សែប្រយុទ្ធប្រេស៊ីល Matheus បានទម្លុះសំណាញ់ទី ក្រុមណាហ្គាវើលដ៏ ដើម្បីធ្វើឱ្យក្រុមទាំង២ បានបញ្ចប់ការប្រកួតក្នុងលទ្ធផលស្មើគ្នា ១-១។ ចំណែកក្រុមគិរីវង់សុខសែនជ័យ បានយកឈ្នះក្រុមម្ចាស់ផ្ទះអគ្គិសនីកម្ពុជា ២-០ ហើយក្រុមកងយោធពលខេមរភូមិន្ទ បានត្រឹមស្មើក្រុមម្ចាស់ផ្ទះនគរបាលជាតិ ១-១ កាលពីថ្ងៃសៅរ៍៕