កីឡាករជាកូនកំព្រា អេ ណារ័ត្ន ពិតជាធ្វើបានសម្រេចដូចក្តីរំពឹង ក្នុងការក្រសោបយកប្រាក់លាន ពីសង្វៀនថោន ទៅជូនប្រពន្ធ ដែលកំពុងមានជីវភាពខ្ពស់ខាត ប៉ុន្តែកីឡាការិនី វី ស្រីស្រស់ និង ទូច ចាន់វត្តី ដែលសុទ្ធតែមានការតាំងចិត្តខ្ពស់ ក្នុងការដណ្តើមយកជ័យជម្នះនោះ គឺមិនអាចធ្វើទៅបាននោះទេ។
តាមរយៈការប្រកួតម៉ារ៉ាតុងដណ្តើមប្រាក់លាន កាលពីថ្ងៃអាទិត្យ ម្សិលមិញនេះ អេ ណារ័ត្ន បានយកឈ្នះ ឡុង ខេត្ត ដោយពិន្ទុដាច់ នៅក្នុងការប្រកួតវគ្គជម្រុះតាមពូល មុនពេលរូបគេបានបន្តទៅផ្តួល ភួន ឡាំងកូស៊ីន នៅវគ្គផ្តាច់ព័ត្រ ឱ្យបោះបង់ការប្រកួត ក្នុងទឹកទី២ តាមរយៈការទាត់ស្តាំចូលកណ្តៀតក្អម នាំឱ្យ ភួន ឡាំងកូស៊ីន ចុលរមួល មិនអាចបន្តការប្រកួតទៀតបាន។
ការទទួលបានជ័យជម្នះ ដើម្បីក្លាយជាម្ចាស់ជើងឯកនេះ បានជួយឱ្យ អេ ណារ័ត្ន ទទួលបានប្រាក់រង្វាន់ចំនួន ៣,៤លានរៀល ដើម្បីយកទៅឱ្យប្រពន្ធ ដែលកំពុងមានជីវភាពខ្វះខាត ស្របទៅតាមការតាំងចិត្តរបស់គេ ព្រោះ អេ ណារ័ត្ន បានប្តេជ្ញាដណ្តើមឱ្យបានប្រាក់លាននេះ តាំងពីមុនការប្រកួតចាប់ផ្តើមម្ល៉េះ។
យ៉ាងណាក៏ដោយ ការដណ្តើមបានតំណែងជើងឯកនេះ ក៏អាចមកពីជើងខ្លាំង ខេម ចាន់ ត្រូវបានដកបេក្ខភាពចេញពីការប្រកួតនេះផងដែរ បន្ទាប់ពីបានធ្វើតេស្ត មុនការប្រកួត ឃើញវិជ្ជមានជំងឺកូវីដ១៩ ខណៈមុននឹងកើតហេតុដ៏ឱ្យរន្ធត់នេះ ខេម ចាន់ បានបញ្ជាក់ថា គេនឹងដណ្តើមឱ្យបានប្រាក់លាននេះដូចគ្នា ហើយនៅក្នុងបេក្ខភាពទាំង៤នេះ ខេម ចាន់ ចង់ជួប អេ ណារ័ត្ន មុនគេ ហើយបើជួបគ្នាមែននោះ អេ ណារ័ត្ន អាចនឹងធ្លាក់ត្រឹមវគ្គជម្រុះ៣ទឹក។
តែទោះបីជាយ៉ាងណា ការរកឃើញនៅជំងឺកូវីដ១៩លើបេក្ខភាព ខេម ចាន់ គឺគណៈកម្មការ បានសម្រេចដាក់ ឡុង ខេត្ត ឱ្យចូលជំនួស តែ ឡុង ខេត្ត ដែលបានឡើងប្រកួត ដោយមិនបានត្រៀមខ្លួននោះ បានចាញ់ពិន្ទុ អេ ណារ័ត្ន នៅក្នុងវគ្គជម្រុះ ដូចគ្នាទៅនឹងកីឡាករ សូដា លីម៉ូ ផងដែរ ដែលបានធ្លាក់ ក្រោយចាញ់ពិន្ទុ ភួន ឡាំងកូស៊ីន ដោយពិន្ទុមិនឯកច្ឆន្ទ ៤-១។
ដោយឡែកការប្រកួតគូស្រ្តីរវាងស្រីស្អាត ទូច ចាន់វត្តី និង វី ស្រីស្រស់ ដែលទទួលបានការគាំទ្រយ៉ាងខ្លាំងនោះ គឺរកមិនឃើញអ្នកឈ្នះនោះទេ ដោយអ្នកទាំង២នេះ បានបញ្ចប់ការប្រកួត៥ទឹកពេញ ដោយលទ្ធផកលស្មើគ្នា ប៉ុន្តែការប្រកួតនេះ បានផ្លាស់ប្តូររូបមន្តប្រកួតភ្លាមៗ។
ដំបូងឡើយ ទូច ចាន់វត្តី និង វី ស្រីស្រស់ ត្រូវដាក់ឱ្យប្រកួត Mas Fight មួយទឹកមាន៩នាទី ដោយអ្នកទាំង២នេះ សុទ្ធតែមានការប្តេជ្ញាចិត្តរៀងៗខ្លួន គឺ ទូច ចាន់វត្តី ប្តេជ្ញាខំប្រឹងយកឈ្នះ ដើម្បីសងសឹកចំពោះការចាញ់ វី ស្រីស្រស់ កាលពីអតីតកាល ចំណែក ស្រីស្រស់ ចង់ផ្តួល ចាន់វត្តី ឱ្យសន្លប់ ដើម្បីយកប្រាក់រង្វាន់បន្ថែម តាមច្បាប់របស់ Mas Fight។
យ៉ាងណាក៏ដោយ នៅពេលប្រកួតជាក់ស្តែង កាលពីថ្ងៃអាទិត្យ ម្សិលមិញនេះ អ្នកទាំង២នេះ ត្រូវបានដាក់ឱ្យប្រកួតគុនខ្មែរ ចំនួន៥ទឹក ដោយ១ទឹកមាន៣នាទីវិញ ហើយតាមរយៈការប្រកួតយ៉ាងស្វិតស្វាញ ក្រោមការគាំទ្រយ៉ាងច្រើននោះ គឺអ្នកទាំង២ ត្រូវបានអាជ្ញាកណ្តាលលើកដៃឱ្យស្មើគ្នា គឺគ្មានអ្នកឈ្នះនោះទេ៕