បរទេស៖ ក្លិបតោខៀវ Chelsea អាចនឹងបង្កើនសំណើដេញថ្លៃរបស់ខ្លួនដើម្បីទិញ Romelu Lukaku ក្រោយពីសំណើក្នុងទឹកប្រាក់១០០លានអឺរ៉ូ (ស្មើនឹង១១៩លានដុល្លារអាមេរិក) បូកទាំង Marcos Alonso ម្នាក់ទៀត ដើម្បីនាំយកខ្សែប្រយុទ្ធអន្តរជាតិបែលហ្ស៊ិករូបនេះ ត្រូវបានច្រានចោល។
លោក Thomas Tuchel ចង់បានខ្សែប្រយុទ្ធថ្មីម្នាក់ ហើយ Lukaku ត្រូវបានចាត់ទុកថា ជាខ្សែប្រយុទ្ធដែលមានភាពមុតស្រួចជាង Erling Haaland ដែលអាចនឹងនៅតែបន្តនៅក្នុងក្លិប Borussia Dortmund ក្នុងរយៈពេល១រដូវកាលទៀត។ ក្លិប Inter Milan បានប្តេជ្ញាចិត្តថា នឹងមិនលក់ខ្សែប្រយុទ្ធកំពូលរបស់ខ្លួនឡើយ ប៉ុន្តែ Chelsea សង្ឃឹមថា ក្រុមម្ចាស់ជើងឯកអ៊ីតាលីមួយនេះ នឹងបង្ខំំចិត្តលក់ចេញ ដោយសារតែបញ្ហាផ្នែកហិរញ្ញវត្ថុរបស់ពួកគេ។ វាត្រូវបានគេយល់ឃើញថា ការព្យាយាមរបស់ Chelsea អាចនឹងទទួលបានជោគជ័យ ប្រសិនបើពួកេបង្កើនសំណើដេញថ្លៃរហូតដល់ទៅ១២០លានអឺរ៉ូ។ ក្លិប Inter ត្រូវបានគេជឿជាក់ថា ចង់បានការផ្ទេរជាសាច់ប្រាក់ភ្លាមៗជាងការដែលការដែលយកកីឡាករជាថ្នូរនឹងកីឡាករ។
Lukaku បានដើរតួនាទីដ៏សំខាន់ក្នុងពេល Inter បានឈ្នះពាន Serie A ដោយបានស៊ុតបាល់បញ្ចូលទី២៤គ្រាប់ និងជួយឲ្យមិត្តរួមក្រុមរកបាន១១គ្រាប់ផ្សេងទៀត។ កីឡាករវ័យ២៨ឆ្នាំរូបនេះ បានក្លាយជាខ្សែប្រយុទ្ធកម្រិតកំពូលក្នុងពិភពលោក បើគិតចាប់តាំងពីចាកចេញពីក្លិប Manchester United ទៅកាន់អ៊ីតាលី ក្នុងឆ្នាំ២០១៩ និងជាកីឡាករម្នាក់ដែលលោក Tuchel គិតថា អាចជួយឲ្យ Chelsea មានភាពខ្លាំង និងមានសមត្ថភាពប្រជែងដណ្តើមពាន Premier League៕
ប្រភពព័ត៌មាន៖ The Guardian
