បរទេស៖ ខ្សែប្រយុទ្ធ Romelu Lukaku បានវិលទៅកាន់ក្លិប Inter Milan កាលពីថ្ងៃពុធ ក្រោយពីបានបំពេញការផ្ទេរក្នុងលក្ខខណ្ឌខ្ចីជើងពេញមួយរដូវកាល ពីក្លិប Chelsea ក្នុងរយៈពេលត្រឹមតែ១ឆ្នាំ ក្រោយពីការផ្ទេរក្នុងតម្លៃខ្លួនដ៏ខ្ពស់របស់គេពីអ៊ីតាលី ទៅកាន់ក្លិបស្ថិតក្នុងក្របខ័ណ្ឌ Premier League មួយនេះ។
តារាឆ្នើមអន្តរជាតិបែលហ្ស៊ិករូបនេះ នឹងត្រូវវិលទៅជួបអតីតអ្នកគាំទ្ររបស់ខ្លួនវិញនៅកីឡដ្ឋាន San Siro ក្រោយពីក្លិប Chelsea បានយល់ព្រមលើការផ្ទេរមួយនេះ ដែលត្រូវឲ្យ Inter បង់ប្រាក់ចំនួន៨លានអឺរ៉ូ បូករួមទាំងប្រាក់ឧបត្ថម្ភនានាចំនួន៣លានផោនទៀតសម្រាប់ការខ្ចីជើងនេះ។ ក្លិបមានមូលដ្ឋាននៅទីក្រុងឡុងដ៍មួយនេះ បានចេញសេចក្តីប្រកាសមួយដើម្បីបញ្ជាក់ពីការផ្ទេរក្នុងរយៈពេលពេញ១រដូវកាល។
ការវិលត្រឡប់របស់គេ ត្រូវបានធ្វើឡើងជាផ្លូវការក្នុងវីដេអូមួយដែលត្រូវបានបង្ហោះនៅលើបណ្តញសង្គមរបស់ Inter ស្របពេលដែល Lukaku បាននិយាយាថា «យើងវិលត្រឡប់មកវិញហើយអូនសម្លាញ់» ក្នុងពេលនិយាទៅកាន់ប្រធានក្លិបលោក Steven Zhang។ កីឡាករវ័យ២៩ឆ្នាំរូបនេះ នឹងដឹកនាំតំបន់ប្រយុទ្ធរបស់ Inter ម្តងទៀត ខណៈដែលពួកគេព្យាយាមដណ្តើមពាន Serie A ត្រឡប់មកវិញ ក្រោយពីបានយល់ព្រមកាត់ប្រាក់ឈ្នួលមកនៅត្រឹម៨,៥លានអឺរ៉ូ សម្រាប់រដូវកាលខាងមុខនេះ៕
ប្រភពព័ត៌មាន៖ Channel News Asia