បរទេស៖ ក្លិប Internazionale បានរៀបចំកិច្ចពិភាក្សានានាជាមួយនឹងក្លិប Chelsea ជុំវិញការនាំយកខ្សែប្រយុទ្ធ Romelu Lukaku ក្នុងលក្ខខណ្ឌខ្ចីជើង ស្របពេលដែលតារាឆ្នើមរូបនេះ ទំនងដូចជាចង់ចូលរួមជាមួយនឹងអតីតក្លិបរបស់គេវិញ។
ក្លិប Chelsea បានប្រាប់ Lukaku កាលពីសប្តាហ៍មុនថា ពួកគេបានត្រៀមអនុញ្ញាតឲ្យរូបគេចាកចេញ ហើយឱកាសដែលកិច្ចព្រមព្រៀងនេះ អាចដំណើរការបាន អាស្រ័យទៅលើចំនួនទឹកប្រាក់ដែលក្លិប Inter ចង់ចំណាយលើតម្លៃខ្លួនខ្ចីជើង សម្រាប់កីឡាករវ័យ២៩ឆ្នាំរូបនេះ និងអាស្រ័យទៅលើថា តើពួកគេត្រៀមចំណាយលើប្រាក់បៀរវត្សរ៍រហូតដល់ទៅ៣២,៥ម៉ឺនផោន ក្នុងមួយសប្តាហ៍ ឬយ៉ាងណា។ ក្លិបរបស់អុីតាលីមួយនេះ មិនមានលទ្ធភាពទិញរូបគេយកដាច់ឡើយ។
Lukaku ដែលបានជួបរដូវកាលដ៏ត្រដាបត្រដួស ក្រោយពីចូលរួមជាមួយនឹងក្លិប Chelsea ក្នុងតម្លៃខ្លួន៩៧,៥លានផោន (ស្មើនឹង១១៩លានដុល្លារអាមេរិក) ដឹងយ៉ាងច្បាស់ថា រូបគេត្រូវតែទទួលយកការកាត់ប្រាក់ខែ ប្រសិនបើការផ្ទេរនេះ ត្រូវបានឈានដល់។ ក្លិប Chelsea ក៏អាចនឹងចាំបាច់ត្រូវតែជួយចំណាយលើប្រាក់ខែមួយផ្នែករបស់គេផងដែរ។ ក្លិប Chelsea ចង់បានតម្លៃខ្លួនពីការខ្ចីជើងចំនួន២០លានផោនប៉ុន្តែ Inter ចង់ចំណាយតិចជាងនេះ ហើយតម្លៃខ្លួននៃការខ្ចីជើងក្នុងចន្លោះ១០លាន ទៅ១២លានអឺរ៉ូ គួរតែគ្រប់គ្រាន់៕
ប្រភពព័ត៌មាន៖ The Guardian
