បរទេស៖ Romelu Lukaku នឹងត្រូវចុះហត្ថលេខាជាមួយនឹងក្លិប Chelsea ពីក្លិប Inter Milan ក្នុងការផ្ទេរមួយដែលមានតម្លៃខ្លួនរហូតដល់ទៅ១១៥លានអឺរ៉ូ (ស្មើនឹង១៣៥លានដុល្លារអាមេរិក)។
នេះបើយោងទៅតាមបណ្តាញសារព័ត៌មាននានា នៅក្នុងប្រទេសអ៊ីតាលី កាលពីថ្ងៃអាទិត្យ។ ក្លិប Chelsea បានព្យាយាមប្រមាញ់ទិញ Lukaku តាំងពីមានភាពច្បាស់លាស់ថា ក្រុមម្ចាស់ជើងឯកទ្វីបអឺរ៉ុបមួយនេះ នឹងមិនអាចនាំយកតារាឆ្នើម Erling Braut Haaland ពីក្លិប Borussia Dortmund បានឡើយប៉ុន្តែ Inter ក៏បានព្យាយាមរារាំងខ្សែប្រយុទ្ធរបស់ខ្លួនមិនឲ្យចាកចេញផងដែរ។ ប៉ុន្តែ ទោះបីជាយ៉ាងណា បច្ចុប្បន្ន Inter កំពុងតែរៀបចំលក់ខ្សែប្រយុទ្ធអន្តរជាតិបែលហ្ស៊ិករូបនេះចេញ ក្នុងត្លៃខ្លួនមួយដែលប្រហាក់ប្រហែលនឹងតម្លៃខ្លួនជាកំណត់ត្រាដែលត្រូវបានចំណាយដោយក្លិបអង់គ្លេស ត្រឹមតែរយៈប៉ុន្មានថ្ងៃប៉ុណ្ណោះ ក្រោយពីក្លិប Manchester City បានជះប្រាក់១០០លានផោន (ស្មើនឹង១១៨លានអឺរ៉ូ) ដើម្បីនាំយកខ្សែបម្រើអន្តរជាតិអង់គ្លេស Jack Grealish ពីក្លិប Aston Villa។
Lukaku ដែលបានជួយឲ្យក្លិប Inter លើកពាន Serie A កាលពីឆ្នាំមុន ដំបូងឡើយ ចង់បន្តនៅប្រទេសអ៊ីតាលី ក្រោយពីបានក្លាយជាកីឡាករដ៏មានប្រជាប្រិយភាពក្រោមការដឹកនាំរបស់លោក Antonio Conte។ តារាឆ្នើមរូបនេះ បានស៊ុតបាល់បញ្ចូលទី២៤គ្រាប់ក្នុងការប្រកួតក្របខ័ណ្ឌលីកកាលពីរដូវកាលមុន ហើយក៏បានជាប់ជាកីឡាករឆ្នើមប្រចាំរដូវកាលផងដែរ៕
ប្រភពព័ត៌មាន៖ Channel News Asia