បរទេស៖ ក្លិប Barcelona ធ្លាប់សង្ឃឹមថា អាចរក្សាទុក Lionel Messi ហើយតារាឆ្នើមអន្តរជាតិអាហ្សង់ទីនរូបនេះ ក៏ចង់បន្តនៅផងដែរ។ ប៉ុន្តែ ហេតុអ្វីបានជា រូបគេត្រូវចាកចេញពីក្លិប Barcelona ដែលជាកន្លែងរូបគេបានចំណាយពេលលេងឲ្យអស់រយៈពេល១៧ឆ្នាំ?
ក្លិប Barcelona បានបញ្ជាក់ថា ពួកគេគ្មានជម្រើសអ្វីក្រៅពីបញ្ចេញកីឡាករវ័យ៣៤ឆ្នាំរូបនេះ ដោយគ្មានតម្លៃខ្លួន ក្រោយពីកិច្ចសន្យារបស់គេផុតកំណត់កាលពីខែមិថុនា ដោយសារតែពួកគេត្រូវព្យាយាមលុបចោលចំណុលដល់ទៅ១,២ពានលានអឺរ៉ូ (ស្មើនឹង១,៤លានដុល្លារអាមេរិក)។ Messi បានយល់ព្រមកាត់ប្រាក់ខែរបស់ខ្លួន៥០% ហើយការសិក្សានានាបានឃើញថា តម្លៃខ្លួនផ្នែកពាណិជ្ជកម្មចំពោះក្លិបនេះ ពិតជាខ្ពស់ជាងការចំណាយទៅលើប្រាក់ខែរបស់គេទៅទៀត។
ប៉ុន្តែ ទោះបីជាយ៉ាងណា បំណុលទាំងនោះ និងភាពចាំបាច់ក្នុងការអនុវត្តាមច្បាប់កំណត់ប្រាក់ខែដ៏តឹងរ៉ឹងរបស់ក្របខ័ណ្ឌលីកអេស្ប៉ាញ បានបង្ខំឲ្យ Messi ចាកចេញតែម្តង។ ក្លិប Barcelona បានចំណាយប្រាក់ចំនួន២២២លានអឺរ៉ូ ដែលពួកគេបានទទួលពីក្លិប PSG ក្នុងឆ្នាំ២០១៧ ពីការលក់ Neymar តាមរយៈការទិញកីឡាករ Philippe Coutinho, Antoine Griezmann និង Ousname Dembele ក្នុងតម្លៃខ្លួនច្រើនជាង១០០លានអឺរ៉ូដូចគ្នា។ លោក Joan Laporta ដែលជាប្រធានក្លិប បានទទួលស្គាល់ថា ការខាតបង់កាលពីរដូវកាលមុន មានចំនួនរហូតដល់ទៅ៥០០លានអឺរ៉ូ និងបានបញ្ជាក់ថា លោកមិនអាចធ្វើឲ្យក្លិបជាប់បំណុលកាន់តែច្រើនបន្ថែមទៀតដោយសារតែកីឡាករណាម្នាក់ឡើយបូករួមទាំង Messi ដែរ៕
ប្រភពព័ត៍មាន៖ Channel News Asia
