បរទេស៖ ខ្សែប្រយុទ្ធ Lionel Messi បានសន្យាថា «នឹងជួយកសាងសមិទ្ធិផលពិសេសៗ» នៅ Paris Saint-Germain ក្រោយពីបានបំពេញការផ្ទេររបស់គេ និងបានចុះហត្ថលេខាលើកិច្ចសន្យារយៈពេល២ឆ្នាំ កាលពីថ្ងៃអង្គារ។
តារាឆ្នើមវ័យ៣៤ឆ្នាំរូបនេះ ដែលទើបតែបាននិយាយថា លាហើយទាងរំជួលចិត្តទៅកាន់ក្លិប Barcelona ក្រោយពីបានចំណាយពេលអស់២១ឆ្នាំ ជាមួយនឹងក្លិបនេះ នឹងត្រូវគេអមដំណើរទៅកាន់ទីក្រុងប៉ារីសនៅថ្ងៃពុធនេះ ខណៈដែល Messi ត្រៀមខ្លួនរួចរាល់ក្នុងការចាប់ផ្តើមទំព័រថ្មី នៅក្នុងប្រវត្តិសាស្ត្រកីឡាបាល់ទាត់។ ក្រោយពីបានចុះហត្ថលេខាលើកិច្ចសន្យារយៈពេល២ឆ្នាំ ជាមួយនឹងជម្រើសក្នុងការបន្តរយៈពេល១២ខែទៀត Messi បានឲ្យដឹងថា៖ «ខ្ញុំពិតជារំភើបណាស់ក្នុងការចាប់ផ្តើមទំព័រថ្មីនៃអាជីពរបស់ខ្ញុំជាមួយនឹង Paris Saint-Germain។ ក្លិបនេះ និងទស្សនវិស័យរបស់ខ្លួន ពិតជាស៊ីសង្វាក់គ្នាជាមួយនឹងមហិច្ឆតារបស់ខ្ញុំ»។ ខ្សែប្រយុទ្ធអន្តរជាតិអាហ្សង់ទីនរូបនេះ បានបន្ថែមទៀតថា៖ «ខ្ញុំស្គាល់យ៉ាងច្បាស់ពីកម្រិតនៃទេពកោសល្យដែលក្រុមនេះ និងបុគ្គលិកគ្រូបង្វឹក មាននៅទីនេះ។ ខ្ញុំប្តេជ្ញាចិត្តថា នឹងជួយកសាងសមិទ្ធិផលពិសេសៗ សម្រាប់ក្លិប និងអ្នកគាំទ្រហើយខ្ញុំកំពុងសម្លឹងឆ្ពោះទៅកាន់ការបោះជំហានលើទីលាន Parc des Princes»។
Messi ដែលនឹងពាក់អាវលេខ៣០នៅ PSG នឹងទទួលបានប្រាក់ខែសុបប្រមាណជា៣៥លានអឺរ៉ូ (ស្មើនឹង៤០លានដុល្លារអាមេរិក) ក្នុង១ឆ្នាំ បូករួមទាំងប្រាក់ឧបត្ថម្ភនានា។ Messi ក៏នឹងទទួលបានចំណូល២៥លានអឺរ៉ូ សម្រាប់ការចុះហត្ថលេខាមួយនេះផងដែរ៕
ប្រភពព័ត៌មាន៖ The Guardian
