បរទេស៖ ការផ្ទេរដ៏រំភើបរបស់ Lionel Messi ទៅកាន់ក្លិប Paris Saint-Germain ត្រូវបានប្រកាសជាផ្លូវការហើយ ហើយការផ្ទេរនេះ បាននាំឲ្យរូបគេក្លាយជាកីឡាករម្នាក់ក្នុងចំណោមកីឡាករដែលរកបានចំណូលខ្ពស់ជាងគេបំផុតក្នុងកីឡាបាល់ទាត់។ បើយោងទៅតាមប្រភពព័ត៌មាននានា ក្លិប PSG បានផ្តល់ប្រាក់ខែឲ្យកីឡាករដ៏ឆ្នើមបំផុតក្នុងពិភពលោករូបនេះ ប្រមាណជា៣៥លានអឺរ៉ូ (ស្មើនឹង៤០លានដុល្លារអាមេរិក) ក្នុង១រដូវកាល បន្ទាប់ពីកាត់ពន្ធ។
ហេតុនេះ តើ Messi នឹងទទួលបានចំណូលប៉ុន្មានក្នុង១សប្តាហ៍នៅ PSG?
ជាមួយនឹងប្រាក់ចំណូល៣៥លានអឺរ៉ូ ក្នុង១រដូវកាល Messi នឹងទទួលបានប្រាក់ចំណូលជិត៣លានអឺរ៉ូ ក្នុង១ខែ។ ហេតុនេះ មានន័យថា Messi នឹងទទួលបាន៧២,៩ម៉ឺនអឺរ៉ូ ក្នុង១សប្តាហ៍ ឬ ១០,៤ម៉ឺនអឺរ៉ូ ក្នុង១ថ្ងៃ ឬ៨៦៨០អឺរ៉ូ ក្នុង១ម៉ោង ឬ ១៤៤,៦៨អឺរ៉ូ ក្នុង១នាទី ឬ ២,៤១ក្នុង១វិនាទី។ ជាមួយគ្នានេះ Messi ក៏នឹងទទួលបានទឹកប្រាក់ចំនួន២៥លានអឺរ៉ូ លើតម្លៃនៃការចុះកិច្ចសន្យាផងដែរ។ អ្វីដែលគួរឲ្យចាប់អារម្មណ៍នោះគឺថា Messi ទទួលបានចំណូលច្រើនជាង Neymar ទៅទៀត ខណៈដែលតារាឆ្នើមអន្តរជាតិប្រេស៊ីលរូបនេះ ទទួលបាន៣១លានអឺរ៉ូ ក្នុង១ឆ្នាំ ហើយ PSG ក៏កំពុងតែពិភាក្សាជាមួយនឹង Kylian Mbappe លើការបន្តកុងត្រាថ្មីផងដែរ ជាមួយនឹងការផ្តល់ជូនប្រាក់ខែដូចគ្នានេះ៕
ប្រភពព័ត៌មាន៖ Yahoo.com
