បរទេស៖ Lionel Messi បានរៀបចំគម្រោងភ្លាមៗសម្រាប់ខ្លួនឯង ខណៈដែលរូបគេកំណត់គោលដៅរបស់ខ្លួនលើការជួយឲ្យក្លិបថ្មីរបស់គេ Paris St-Germain ឈ្នះពានក្របខ័ណ្ឌ Champions League ជាលើកដំបូងរបស់ពួកគេ ក្នុងការបង្ហាញខ្លួនជាផ្លូវការនៅប្រទេសបារាំង កាលពីថ្ងៃពុធ។
តារាឆ្នើមអន្តរជាតិអាហ្សង់ទីនវ័យ៣៤ឆ្នាំរូបនេះ បានយល់ព្រមបន្តនៅជាមួយនឹងអតីតក្លិបរបស់ខ្លួនគឺ Barcelona ក្រោយពីកិច្ចសន្យារបស់គេផុតកំណត់កាលពីចុងខែមិថុនា នៅមុនពេលក្លិបយក្សអេស្ប៉ាញមួយនេះ បានបញ្ជាក់ថា ពួកគេមិនមានលទ្ធភាពក្នុងការចំណាយលើ Messi ឡើយ កាលពីសប្តាហ៍មុន។ Messi បានចុះកិច្ចសន្យារយៈពេល២ឆ្នាំ ជាមួយនឹងជម្រើសក្នុងការបន្តនៅឆ្នាំទី៣ ជាមួយនឹងក្លិប PSG កាលពីថ្ងៃអង្គារ។ PSG បានឈ្នះពានក្នុងស្រុកជាច្រើន បើគិតចាប់តាំងពីការបណ្តាក់ទុននូវទឹកប្រាក់ដ៏ច្រើនសន្ធឹកសន្ធាប់ពីក្រុមហ៊ុនកាតា Sports Investment ក្នុងឆ្នាំ២០១១។
ប៉ុន្តែ ពួកគេមិនធ្លាប់បានឈ្នះពានក្របខ័ណ្ឌ Champions League ឡើយ ស្របពេលដែល Messi ធ្លាប់បានឈ្នះ៤លើក ដោយលើកចុងក្រោយបានកើតឡើងក្នុងឆ្នាំ២០១៥។ Messi ដែលនឹងពាក់អាវលេខ៣០ បានប្រាប់សន្និសីទសារព័ត៌មានថា៖ «នោះគឺជាមូលហេតុដែលខ្ញុំនៅទីនេះដើម្បីឈ្នះពានជាច្រើន។ នេះគឺជាក្លិបដ៏មានមហិច្ឆតាមួយ។ អនកអាចមើលឃើញថា ពួកគេត្រៀមខ្លួនរួចរាល់ហើយក្នុងការប្រជែងរាល់ពានទាំងអស់។ សុបិនរបស់ខ្ញុំគឺការឈ្នះពាន Champions League មួយទៀត ហើយខ្ញុំគិតថា នេះគឺជាកន្លែងដ៏ល្អឥតខ្ចោះ ក្នុងការសម្រេចឲ្យបានគោលដៅនោះ»៕
ប្រភពព័ត៌មាន៖ Channel News Asia