បរទេស៖ Lionel Messi បានបដិសេធសំណើរផ្ទេរទៅកាន់ក្លឹបគូប្រជែងក្របខណ្ឌ La Liga របស់ពួកគេគឺ Atletico Madrid នៅរដូវក្តៅនេះដោយសម្រេចជ្រើសរើសការផ្លាស់ទៅកាន់ក្លឹបយក្សបារាំង Paris Saint-Germainជំនួសវិញ ។បច្ចុប្បន្នកីឡាករវ័យ ៣៤ ឆ្នាំរូបនេះបានចុះហត្ថលេខាជាផ្លូវការសម្រាប់ក្លឹបនៅក្របខ័ណ្ឌ Ligue 1 ដោយចូលរួមជាមួយក្រុមលោក Mauricio Pochettino ក្នុងកិច្ចសន្យារយៈពេល ២ ឆ្នាំដំបូងជាមួយនឹងជម្រើសបន្ថែមថ្មីមួយឆ្នាំទៀត។
យោងតាមអ្នកសារព័ត៌មានជនជាតិអាហ្សង់ទីនលោក Ignacio Miguelez បានឱ្យដឹងថា Messi បានធ្វើការពិចារណាយ៉ាងខ្លាំងក្នុងការផ្លាស់ទៅក្លឹបដែលមានមូលដ្ឋាននៅរាជធានីអេស្បាញមួយនេះជាមួយ និងឪកាសធ្វើអោយរូបគេអាចនិងចូលរួមលេងចាប់ដៃគូជាមួយអតីតមិត្តរួមក្រុម Barcelona និងជាមិត្តភក្តិដ៏ជិតស្និទ្ធគឺ Luis Suarez ។ក្នុងនោះដែរគ្រូបង្វឹកសញ្ជាតិអាហ្សង់ទីន លោក Diego Simeone ត្រូវបានគេជឿជាក់ថាជាអ្នកទទួលខុសត្រូវផ្ទាល់ចំពោះការចរចានេះប៉ុន្តែលោកមិនអាចបញ្ចុះបញ្ចូលម្ចាស់ពានបាល់មាស Ballon d’Or ៦ សម័យកាលឱ្យផ្លាស់មកកាន់កីឡាដ្ឋានចូលរួមបានឡើយ។
គួរបញ្ជាក់ថាMessi បានចាកចេញពីក្លឹបបាសេឡូណាក្រោយចំណាយពេល១៧រដូវកាល និងបូករួមទាំងការហ្វឹកហាត់នៅថ្នាលយុវជនសរុប រយៈពេល ២១ ឆ្នាំ។ ការចំណាយពេលដ៏ជោគជ័យនៅទឹកដី Camp Nou បានឈានដល់ទីបញ្ចប់ដោយសារក្លឹបក្លឹបកាតាឡានមិនអាចបន្តកុងត្រាអតីតប្រធានក្រុមរបស់ពួកគេបាន ទៀតដោយសារបញ្ហាហិរញ្ញវត្ថុដ៏ធ្ងន់ធ្ងរនិងខុសពីលក្ខណ្ឌបាល់ទាត់អេស្បាញ។ កីឡាករសញ្ជាតិអាហ្សង់ទីនរូបនេះនិងលេងក្រោមការបង្វឹករបស់គ្រូបង្វឹករួមជាតិ លោក Mauricio Pochettino នៅ PSG ហើយត្រូវបានគេរំពឹងថាPSGនឹងបង្កើតកំលាំងជួរមុខដ៏គួរអោយភ័យខ្លាចបីរូបមានដូចជា Neymar និង Kylian Mbappe នៅរដូវកាល២០២១-២០២២នេះ៕
ប្រភពព័ត៍មាន៖ Sportsmole