បរទេស៖ អ្នកចាំទី Kepa Arrizabalaga បានក្លាយជាវីរបុរសដ៏មិននឹកស្មានដល់ ខណៈដែល Chelsea បានចាប់ផ្តើមរដូវកាលថ្មីរបស់ខ្លួនតាមរយៈការឈ្នះពានប្រចាំអ្វីបអឺរ៉ុបមួយផ្សេងទៀត នៅពេលដែលពួកគេបានផ្តួលក្រុម Villarreal ដោយការស៊ុតបាល់ប៉េណាល់ទីក្នុងលទ្ធផល ៦-៥ ដើម្បីឈ្នះពាន UEFA Super Cup នៅទីក្រុង Belfast ក្រោយពីបានបញ្ចប់ក្នុងលទ្ធផលស្មើ ១-១ នៅម៉ោងធម្មតា។
អ្នកចាំទីសញ្ជាតិអេស្ប៉ាញរូបនេះ ដែលបានបាត់បង់តំណែងក្នុងជម្រើសដំបូងរបស់ខ្លួន ចាប់តាំងពីចូលរួមជាមួយនឹងក្លិប Chelsea ក្នុងតម្លៃខ្លួនជាកំណត់ត្រាពិភពលោកសម្រាប់អ្នកចាំទីម្នាក់ ក្នុងឆ្នាំ២០១៨នោះ ត្រូវបានលោក Thomas Tuchel ដាក់ឲ្យចូលេងនៅនាទីបន្ថែម១៥នាទី២ដង ក្នុងនាមជាកីឡាករបម្រុង ដើម្បីទទួលខុសត្រូវក្នុងការស៊ុតបាល់ប៉េណល់ទី។
Kepa ធ្លាប់បានបដិសេធមិនប្តូរចេញ ក្នុងពេលស្ថិតក្រោមការដឹកនាំរបស់អតីតគ្រូបង្វឹកនៃក្រុម Chelsea លោក Maurizio Sarri ក្នុងពេលរងបរាជ័យក្នុងការប្រកួតពាន League Cup វគ្គផ្តាច់ព្រ័ត្រ ក្រោមស្នាដៃក្រុម Manchester City កាលពី២ឆ្នាំមុន។
ប៉ុន្តែ នៅពេលនេះ រូបគេបានតបស្នងចំពោះការជឿជាក់របស់គ្រូបង្វឹកខ្លួន តាមរយៈការសង្គ្រោះបាល់ពីការស៊ុតរបស់កីឡាករ Aissa Mandi និង Raul Albiol។ Chelsea បានយកឈ្នះលើក្រុម Manchester City ក្នុងទីក្រុង Porto ដើម្បីលើកពាន Champions League ជាលើកទី២កាលពីខែឧសភា ហើយនេះគឺជាសមិទ្ធិផលដ៏ល្អឥតខ្ចោះរបស់លោក Tuchel ក្នុងការដឹកនាំត្រឹមតែរយៈពេល៥ខែដំបូង៕
ប្រភពព័ត៌មាន៖ Channel News Asia
