បរទេស៖ ក្របខ័ណ្ឌអេស្ប៉ាញ La Liga ដែលកាលី៣ឆ្នាំគឺជាលីកដ៏ខ្លាំងនៅតំបន់អឺរ៉ុបនោះ នឹងបើករដូវកាលថ្មីរបស់ខ្លួននៅរាត្រីថ្ងៃសុក្រ ក្រោយពីជួបដំណាក់កាលដ៏ជ្រួលច្របល់មួយ ដែលបានបញ្ចប់ដោយការបោះចោលដុំពេជ្ររបស់ខ្លួនឲ្យទៅគេ។
ការផ្ទេរដោយគ្មានតម្លៃខ្លួនរបស់តារាឆ្នើម Lionel Messi ទៅកាន់ក្លិប Paris Saint-Germain កាលពីថ្ងៃអង្គារ បានបង្កើតឲ្យមានភាពជ្រួលច្របល់ផ្នែកហិរញ្ញវត្ថុ ដែលកំពុងតែកើតឡើងក្នុងពិភពកីឡាបាល់ទាត់អេស្ប៉ាញ។ បើទោះបី Messi គឺជាតារាឆ្នើមបំផុតរបស់ពួកគេ ដែលត្រូវចាកចេញ ហើយអតីតក្លិបរបស់គេ Barcelona បានលិចលុងជាពិសេសក្នុងបំណុលរហូតដល់ទៅ១,២ពាន់លានអឺរ៉ូក៏ដោយ ប៉ុន្តែ កីឡាបាល់ទាត់អេស្ប៉ាញ ពិតជាមានការព្រួយបារម្ភលើសាច់ប្រាក់។ ការរាតត្បាតនៃជំងឺកូវីដ ១៩ បានធ្វើឲ្យក្លិបស្ថិតក្នុងក្របខ័ណ្ឌកំពូលខាតបង់ប្រាក់រហូតដល់ទៅ២ពាន់លានអឺរ៉ូ (ស្មើនឹង២,៤ពាន់លានដុល្លារអាមេរិក) ហើយការអស់សង្ឃឹមកំពុងតែបង្ហាញឲ្យឃើញរួចជាស្រេច។ ទោះបីជាយ៉ាងណា ទាំងក្លិប Real Madrid និង Barcelona នៅតែព្យាយាមប្រជែងគ្នាដើម្បីក្លាយជាក្រុមខ្លាំងបំផុតប្រចាំអេស្ប៉ាញ។
ក្រុម Valencia នឹងធ្វើជាម្ចាស់ផ្ទះទទួលក្រុម Getafe នៅរាត្រីថ្ងៃសុក្រ ដើម្បីបើករដូវកាលថ្មីនៃក្របខ័ណ្ឌ La Liga ស្របពេលដែលក្រុម Atl. Madrid នឹងចាប់ផ្តើមការការពានរង្វាន់របស់ខ្លួន តាមរយៈការធ្វើដំណើរទៅកាន់ទឹកដីក្រុម Celta Vigo នៅថ្ងៃសៅរ៍ ស្របពេល Real ធ្វើដំណើរទៅជួបក្រុម Alaves។ ដោយឡែក ក្រុម Barcelona នឹងចាប់ផ្តើមការប្រកួតរបស់ខ្លួន ដោយគ្មាន Messi តាមរយៈការធ្វើជាម្ចាស់ផ្ទះទទួលក្រុម Real Sociedad នៅថ្ងៃអាទិត្យ៕
ប្រភពព័ត៌មាន៖ Channel News Asia
