បរទេស៖ Romelu Lukaku បានវិលទៅកាន់ក្លិប Chelsea វិញ កាលពីថ្ងៃព្រហស្បតិ៍ សម្រាប់តម្លៃខ្លួនជាកំណត់ត្រាក្លិប រហូតដល់ទៅ៩៧លានផោន (ស្មើនឹង១៣៥លានដុល្លារអាមេរិក) ពីក្លិប Inter Milan ពោលគឺត្រឹមតែរយៈពេល៧ឆ្នាំ ក្រោយពីការចំណាយពេលជាលើកដំបូងរបស់គេនៅកីឡដ្ឋាន Stamford Bridge បានឈានដល់ទីបញ្ចប់។
ខ្សែប្រយុទ្ធអន្តរជាតិបែលហ្ស៊ិករូបនេះ បានដើរតួនាទីដ៏សំខាន់ក្នុងការជួយឲ្យ Inter លើកពានក្រខ័ណ្ឌ Serie A ជាលើកដំបូងក្នុងរយៈពេល១១ឆ្នាំ កាលពីរដូវកាលមុន ប៉ុន្តែ បញ្ហាហិរញ្ញវត្ថុនៅក្លិយក្សអ៊ីតាលីមួយនេះ បានបង្ខំឲ្យពួគគេត្រូវលក់កីឡាករដ៏សំខាន់បំផុតរបស់ពួកគេ ទៅឲ្យក្លិបស្ថិតក្នុងក្របខ័ណ្ឌ Premier League។ Lukaku ដែលបានចុះហត្ថលេខាលើកិច្ចសន្យារយៈពេល៥ឆ្នាំ បានឲ្យដឹងថា៖ «ខ្ញុំពិតជារីករាយ និងរំភើបណាស់ក្នុងការវិលត្រឡប់មកកាន់ក្លិបដ៏អស្ចារ្យនេះវិញ។
វាបានក្លាយជាដំណើរផ្សងព្រេងដ៏យូរអង្វែងមួយសម្រាប់ខ្ញុំ ដោយខ្ញុំបានមកទីនេះក្នុងនាមជាយុវជនម្នាក់ ដែលត្រូរៀនជាច្រើន ហើយពេលនេះ ខ្ញុំត្រឡប់មកវិញជាមួយនឹងបទពិសោធជាច្រើន និងភាពចាស់ជុំជាងមុន»។ Lukaku វ័យ២៨ឆ្នាំ បានស៊ុតបាល់បញ្ចូលទី៦៤គ្រាប់ ក្នុងរយៈពេល២រដូវកាល នៅអ៊ីតាលី ដើម្បីក្លាយជាវីរបុរសភ្លាមៗនៅកីឡដ្ឋាន San Siro៕
ប្រភពព័ត៌មាន៖ Channel News Asia