បរទេស៖ លោក Nuno Espirito Santo អ្នកចាត់ការទូទៅរបស់ក្រុម Tottenham បានប្រាប់តារាឆ្នើម Harry Kane ឲ្យត្រៀមខ្លួនឲ្យបានរួចរាល់ ដើម្បីជួយដល់ Spurs ក្រោយពីបានផ្តួលក្រុមម្ចាស់ការពារជើងឯក Manchester City ក្នុងលទ្ធផល ១-០ ដើម្បីបើករដូវកាលក្របខ័ណ្ឌ Premier League របស់ពួកគេ កាលពីថ្ងៃអាទិត្យ។
Kane បានអវត្តមានពីក្រុម Spurs ស្របពេលដែលអនាគតរបស់គេជាមួយនឹងក្លិបនេះ នៅតែស្ថិតក្នុងភាពមិនច្បាស់ ស្របពេលដែលមានការចាប់អារម្មណ៍ពីក្លិប Man City។ បើទោះបីអវត្តមានខ្សែប្រយុទ្ធដ៏មុតស្រួចរបស់ខ្លួនក៏ដោយ ប៉ុន្តែ Tottenham បានជួយឲ្យលោក Nuno ចាប់ផ្តើមយ៉ាងល្អក្នុងនាមជាគ្រូបង្វឹក ខណៈដែល Son Heung-min បានរកគ្រាប់បាល់ឈ្នះនៅពីមុខអ្នកគាំទ្រដ៏ច្រើនកុះករ។ អ្នកគាំទ្ររបស់ Spurs បានអបអរជ័យជម្នះជាមួយនឹងការស្រែកច្រៀងបន្ទរគ្នាថា «តើអ្នកកំពុងតែមើល Harry Kane» នៅជិតបញ្ចប់ការប្រកួត ឬយ៉ាងណា។
លោក Nuno បានឲ្យដឹងថា៖ «Harry គឺជាកីឡាករម្នាក់ក្នុងចំណោមកីឡាករដ៏ឆ្នើមបំផុតក្នុងពិភពលោក។ យើងពិតជាមានសំណាងណាស់ក្នុងការមានរូបគេ ហេតុនេះ រូបគេត្រូវតែត្រៀមខ្លួនឲ្យបានរួចរាល់ និងជួយដល់ក្រុម។ ខ្ញុំប្រាកដចិត្តថា ជាមួយនឹងការប្តេជ្ញាចិត្ត និងទេពកោសល្យដែលយើងមាន យើងនងមានក្រុមដ៏ខ្លាំងមួយ»៕
ប្រភពព័ត៌មាន៖ Channel News Asia