បរទេស៖ ក្រុមកាំភ្លើងធំ Arsenal ចង់បានបេក្ខភាពអតីតគ្រូបង្វឹក Chelsea និង Inter Milan លោក Antonio Conte មកជំនួសតំណែងលោក Mikel Arteta។
ទោះបីជាបានជួយក្រុមឈ្នះពាន FA Cup លើកទី ១៤ ក្នុងកំឡុងពាក់កណ្តាលរដូវកាលដំបូងរបស់គាត់ ប៉ុន្តែគ្រូបង្វឹកសញ្ជាតិអេស្ប៉ាញរូបនេះបានត្រឹមតែនាំក្រុមបញ្ចប់ក្នុងចំណាត់ថ្នាក់ទី ៨ ក្នុងក្របខ័ណ្ឌ Premier League កាលពីរដូវកាលមុនប៉ុណ្ណោះ។ រដូវកាល ២០២១-២០២២ Arsenal ក៏ចាប់ផ្តើមរដូវកាលមិនគួរឱ្យជឿដែរបន្តាប់ពីបរាជ័យចាញ់ក្រុមទើបនិងឡើងថ្មី Brentford ២ទល់និង០ ដែលធ្វើអោយអនាគតរបស់លោក Arteta កាន់តែផុយស្រួយនៅទឹកដី Emirate Stadium។ប្រភពពីគេហទំព័រអ៊ីតាលី Tuttosport បានឱ្យដឹងថាក្រុម Arsenal កំពុងពិចារណាពីលទ្ធភាពនាំំយកលោក Conte ប្រសិនបើ Arteta ត្រូវបានបញ្ចប់តួនាទីស្របពេលក្លឹបជឿជាក់ថាគ្រូបង្វឹកសញ្ជាតិអ៊ីតាលីរូបនេះនិងអាចបញ្ចុះបញ្ចូលខ្សែប្រយុទ្ធអន្តរជាតិអាហ្សង់ទីន កីឡាករ Lautaro Martinez មកកាន់ទឹកដីអង់គ្លេសជាមួយគ្នាផងដែរ ។
គួររំលឹកថាលោកConte ធ្លាប់ឈ្នះពានរង្វាន់ក្របខ័ណ្ឌ Premier League រដូវកាល ២០១៦-២០១៧ ពេលចូលមកដឹកនាំChelsea ជាលើកដំបូង និងបានជួយអោយInter Milan ឈ្នះពានSerieA ជាលើកដំបូងក្នុងរយៈពេល១ទសវត្ស។សម្រាប់លោកArteta ទើបតែបានសុំទោសអ្នកគាំទ្រ Arsenal បន្ទាប់ពីបរាជ័យសប្តាហ៏ទី១កាលពីថ្ងៃសុក្រ ធ្លាប់មានប្រវត្តិដឹកនាំឈ្នះ ៤៧លើក ក្នុងចំណោម ៨៧ ប្រកួតចាញ់ ២៤ ដងនិងស្មើ ១៦ លើក៕
ប្រភពព័ត៍មាន៖ Sportsmole