បរទេស៖ ខ្សែប្រយុទ្ធ Tammy Abraham បានបំពេញការផ្ទេរក្នុងតម្លៃខ្លួន៣៤លានផោន (ស្មើនឹង៤៧លានដុល្លារអាមេរិក) ទៅកាន់ក្លិប Roma ក្រោយពីបានគិតថា ខ្លួនឯងគឺជាចំនួនលើសនៅក្នុងក្លិប Chelsea។ Roma បានស្វែងរកខ្សែប្រយុទ្ធថ្មីម្នាក់ជាយូរមកហើយ ក្រោយពីបានលក់ Edin Dzeko ទៅឲ្យក្លិ Internazionale ដែលបានចុះហត្ថលេខាជាមួយនឹងខ្សែប្រយុទ្ធអន្តរជាតិបូស្នីរូបនេះ ក្រោយពីបានអនុញ្ញាតឲ្យ Romelu Lukaku ចូលរួមជាមួយនឹងក្លិប Chelsea ក្នុងតម្លៃខ្លួន៩៧,៥លានផោន។
ការផ្ទេរនេះ ក៏មានន័យថា Roma បានទទួលជ័យជម្នះក្នុងការប្រជែងជាមួយនឹងក្លិប Arsenal ដើម្បីទិញខ្សែប្រយុទ្ធ Abraham ផងដែរ។ កីឡាករវ័យ២៣ឆ្នាំរូបនេះ ត្រូវបានអនុញ្ញាតឲ្យចាកចេញពីក្លិបតាំងពីកុមារភាពរសប់គេ ក្រោយពីបានបង្ហាញខ្លួនត្រឹមតែ១៧នាទីគត់ ក្នុងរយៈពេល៣ខែចុងក្រោយ កាលពីរដូវកាលមុន ក្រោមការដឹកនាំរបស់លោក Thomas Tuchel។ Abraham បានស្ថិតជាកីឡាករបម្រុង ក្រោយពីលោក Tuchel បានចូលជំនួសកន្លែងរសប់លោក Frank Lampard ក្នុងនាមជាអ្នកចាត់ការទូទៅ បើទោះបីខ្សែប្រយុទ្ធរូបនេះ នៅតែបញ្ចប់ក្នុងនាមជាអ្នករកបានគ្រាប់បាល់ច្រើនជាងប្រចាំក្លិប ជាមួយនឹងការរកបាន១២គ្រាប់ក៏ដោយ។
Abraham នៅជាប់កិច្ចសន្យារយៈពេល២ឆ្នាំទៀត ហើយការចាកចេញរបស់គេ គឺមិនអាចជៀសផុតឡើយ ក្រោយពីការវិលត្រឡប់របស់ Lukaku ទៅកាន់កីឡដ្ឋាន Stamford Bridge៕
ប្រភពព័ត៌មាន៖ The Guardian