បរទេស៖ ខ្សែប្រយុទ្ធ Cristiano Ronaldo កាលពីថ្ងៃអង្គារ បានច្រានចោលព័ត៌មានថា រូបគេកំពុងតែព្យាយាមវិលទៅកាន់ក្លិប Real Madrid ត្រឹមតែរយៈពេលប៉ុន្មានម៉ោង ក្រោយពីលោកគ្រូបង្វឹក Carlo Ancelotti បានបញ្ជាក់ដូចគ្នា លោកនឹងមិននាំយកខ្សែប្រយុទ្ធរបស់ក្លិប Juventus រូបនេះទៅកាន់អេស្ប៉ាញឡើយ។
នៅលើបណ្តាញសង្គម Instagram កីឡាករ Ronaldo បានសរសេរថា «រឿងរ៉ាវរបស់គេនៅក្លិប Real Madrid គឺជារឿងដែលត្រូវបានគេប្រឌិតឡើង» បើទោះបីរូបគេមិនបានបញ្ជាក់យ៉ាងច្បាស់ថា រូបគេមិនបានសម្លឹងរកផ្លូវចាកចេញពីក្លិប Juventus ក៏ដោយ។ រូបគេបានបញ្ជាក់ថា ព័ត៌មានចរចាមអារ៉ាមបែបនេះ គឺជាការមិនបង្ហាញពីការគោរព ទាំងលើរូបគេ និងរាល់ក្លិបដែលពាក់ព័ន្ធទាំងអស់ ក៏ដូចជាកីឡាករ និងបុគ្គលិករបស់ពួកគេផងដែរ។
Ronaldo បានឲ្យដឹងថា៖ «មានព័ត៌មាន និងរឿងរ៉ាវជាច្រើន ទាក់ទងនឹងខ្ញុំ ជាមួយនឹងក្លិបមួយចំនួន ក្នុងក្រខ័ណ្ឌលីកផ្សេងៗគ្នា ដោយគ្មាននរណាម្នាក់ព្យាយាមស្វែងរកការពិតឡើយ។ ពេលនេះ ខ្ញុំត្រូវតែចេញមុខនិយាយ ដើម្បីកុំឲ្យមានមនុស្សនិយាយពីខ្ញុំទៀត។ ខ្ញុំនៅតែផ្តោតលើអាជីព និងការងាររបស់ខ្ញុំ ហើយត្រៀមខ្លួនរួចរាល់ចំពោះរាល់ការប្រជែងនានា ដែលខ្ញុំត្រូវតែជួបប្រទះ»៕
ប្រភពព័ត៌មាន៖ Channel News Asia
