បរទេស៖ Inter Milan នឹងចាប់ផ្តើមរដូវកាលថ្មិនៃក្របខ័ណ្ឌ Serie A នៅថ្ងៃសៅរ៍ ចុងសប្តាហ៍នេះ ស្របពេលដែលមានការតវ៉ាពីអ្នកគាំទ្រ និងភាពជ្រួលច្របល់លើផ្នែកហិរញ្ញវត្ថុ ដែលកំពុងតែក្លាយជាឧបសគ្គក្នុងការការពារពានរបស់ពួកគេ នៅមុនពេលការប្រកួតចាប់ផ្តើម។
ភាពគ្មានលំនឹងរបស់ក្រុមម្ចាស់ជើងឯកមួយនេះ បានធ្លាក់ក្នុងកម្រិតកាន់តែជ្រៅ កាលពីសប្តាហ៍ នៅពេលដែលខ្សែប្រយុទ្ធដ៏ឆ្នើមរបស់ពួកគេ Romelu Lukaku ត្រូវបានលក់ទៅឲ្យក្លិប Chelsea ខណៈដែលការផ្ទេរនេះ មិនត្រឹមតែធ្វើឲ្យអ្នកគាំទ្រខឹងសម្បារឡើយ ប៉ុន្តែ ក៏ធ្វើឲ្យប្រធានក្លិបលោក Giuseppe Marotta និងគ្រូបង្វឹកថ្មីលោក Simone Inzaghi ខកចិត្តផងដែរ។ កាសែត Gazzetta dello Sport បានចេញផ្សាយថា Suning ដែលជាក្រុមហ៊ុនម្ចាស់ក្លិប Inter បានបង្ខំចិត្តលក់ខ្សែប្រយុទ្ធអន្តរជាតិបែលហ្ស៊ិក Lukaku ក្រោយពីបានលក់ខ្សែការពារដ៏ឆ្នើម Achraf Hakimi ដែលជាតួអង្គសំខាន់ក្នុងការជួយឲ្យពួកគេលើកពាន Serie A ជាលើកដំបូង បើគិតចាប់តាំងពីឆ្នាំ២០១០ ទៅឲ្យក្លិប Paris Saint-Germain។
បញ្ហាហិរញ្ញវត្ថុរបស់ក្លិបនេះ បង្ហាញឲ្យឃើញយ៉ាងច្បាស់ នៅមុនពេលពួកគេបានឈ្នះពាន ហើយកាលពីខែមុន លោកគ្រូបង្វឹក Antonio Conte បានចាកចេញពីក្លិបនេះ ដោយដឹងថា ក្រុមរបស់លោកនឹងត្រូវរុះរើ។ ពួកគេនៅតែមានកីឡាករឆ្នើមៗជាច្រើនក្នុងក្រុម ប៉ុន្តែ ពិតណាស់ក្រុមរបស់ពួកគេមិនខ្លាំងដូចឆ្នាំមុនឡើយ៕
ប្រភពព័ត៌មាន៖ Channel News Asia