បរទេស៖ ខ្សែប្រយុទ្ធ Pierre-Emerick Aubameyang និង Alexandre Lacazette បានអវត្តមានក្នុងពេលចាញ់ក្រុម Brentford នាការប្រកួតបើករដូវកាលកាលពីសប្តាហ៍មុន ដោយសារតែតេស្តឃើញជាវិជ្ជមានលើវីរុសកូវីដ ១៩។
នេះបើយោងទៅតាមការបញ្ជាក់របស់ក្លិបស្ថិតក្នុងក្របខ័ណ្ឌ Premier League មួយនេះ កាលពីថ្ងៃព្រហស្បតិ៍។ ស្របពេលដែល Aubameyang បានទទួលលទ្ធផលអវិជ្ជមានវិញ ហើយអាចនឹងចូលលេងពេលប្រកួតជាមួយនឹងក្រុម Chelsea នៅថ្ងៃអាទិត្យ ខ្សែប្រយុទ្ធ Lacazette នៅតែត្រូវការពេលសម្រាកព្យាបាលបន្ថែមទៀត។ កីឡាករផ្សេងទៀតដែលតេស្តឃើញវិជ្ជមាន រួមមានអ្នកចាំទី Alex Runarsson និងខ្សែបម្រើសស្លាប Willian ខណៈដែលកីឡាករទាំង២ប្រហែលជាមិនអាចចូលលេងក្នុងពេលប៉ះក្រុម Chelsea នៅកីឡដ្ឋាន Emirates បានឡើយ។ ក្រុមរបស់លោក Mikel Arteta ដែលជាអ្នកចាត់ការទូទៅ ក៏មានបញ្ហាដោយសារតែរបួសកីឡាករផងដែរ ខណៈដែល Thomas Partey, Gabriel Magalhaes និង Eddie Nketiah សុទ្ធសឹងត្រូវអវត្តមានសម្រាប់ការប្រកួតនៅចុងសប្តាហ៍នេះ។
ក្រុម Arsenal ដែលបានរងបរាជ័យក្នុងលទ្ធផល ២-០ លើទឹកដីក្រុម Brentford កាលពីសប្តាហ៍មុន ត្រូវមានការប្រកួតដ៏ស្វិតស្វាញជាច្រើន ដោយបន្ទាប់ពីការប្រកួតជាមួយនឹង Chelsea ពួកគេត្រូវធ្វើដំណើរទៅកាន់ទឹកដីក្រុមម្ចាស់ការពារជើងឯក Manchester City៕
ប្រភពព័ត៌មាន៖ Channel News Asia
