បរទេស៖ ការប្រកួតក្របខ័ណ្ឌបារាំង Ligue 1 រវាងក្រុម Nice និង Marseille ត្រូវបានផ្អាក កាលពីថ្ងៃអាទិត្យ នៅពេលដែលអ្នកគាំទ្ររបស់ក្រុមម្ចាស់ផ្ទះបានរត់ចូលទីលានប្រកួត និងប៉ះទង្គិចជាមួយនឹងកីឡាករជាគូបដិបក្ខ Dimitri Payet ដែលបានគប់ដបដែលត្រូវបានគប់លើរូបគេ ទៅកាន់អ្នកគាំទ្រវិញ នៅមុនពេលជម្លោះផ្ទុះឡើងរវាងកីឡាករ និងអ្នកគាំទ្រ។
ក្រុម Marseille បានបដិសេធក្នុងការបន្តការប្រកួត ខណៈដែលមន្ត្រីប្រចាំក្លិប បានអះអាងថា កីឡាកររបស់ពួកគេបានរងនូវការវាយប្រហារ ហើយថា សុវត្ថិភាពរបស់ពួកគេមិនត្រូវបានធានាឡើយ។ បញ្ហានៅកីឡដ្ឋាន Allianz Riviera បានផ្ទុះឡើងនៅនាទី ទី៧៥ នៅពេលដែលតារាឆ្នើមរបស់ក្លិប Marseille គឺ Payet ដែលបានក្លាយជាគោលដៅនៃការចោលដបជ័រពីលើគ្រប់ពេលដែលរូបគេបានទាត់បាល់ជ្រុងនោះ បានចោលដបមួយទៅកាន់អ្នកគាំទ្ររបស់ Nice។
បន្ទាប់មក អ្នកគាំទ្រដែលខឹងសម្បារ បានរត់ចូលទីលានប្រកួត ដោយបានគំរាមទៅលើ Payet នៅមុនពេលអាជ្ញាកណ្តាលបាននាំក្រុមទាំង២ទៅកាន់កន្លែងសុវត្ថិភាពក្នុងបន្ទប់ផ្លាស់ប្តូរសម្លៀកបំពាក។ ក្រុមសន្តិសុខ បានព្យាយាមទប់ស្កាត់ការរត់ចូលទីលាន នៅមុនពេលជម្លោះបានផ្ទុះឡើងរវាងកីឡាករ បុគ្គលិក និងអ្នកគាំទ្ររវាងក្រុមទាំង២៕
ប្រភពព័ត៌មាន៖ Channel News Asia
