បរទេស៖ ក្រុមញញួរធំ West Ham បានបន្តការចាប់ផ្តើមយ៉ាងល្អឥតខ្ចោះរបស់ពួកគេ នៅរដូវកាលនេះ ខណៈដែលខ្សែប្រយុទ្ធ Michail Antonio បានក្លាយជាអ្នករកបានគ្រាប់បាល់ច្រើនជាងគេក្នុងក្របខ័ណ្ឌ Premier League ប្រចាំក្លិប ក្រោយពីបានស៊ុតបាល់បញ្ចូលទី២គ្រាប់ ក្នុងពេលយកឈ្នះលើក្រុម Leicester ក្នុងលទ្ធផល ៤-១ កាលពីថ្ងៃចន្ទ។
ក្រុមរបស់លោក David Moyes បានរកគ្រាប់បាល់នាំមុខមុន តាមរយៈគ្រាប់បាល់របស់ Pablo Fornals នៅតង់ទី១ នាកីឡដ្ឋាន London។ ក្រោយមក ខ្សែប្រយុទ្ធ Ayoze Perez របស់ក្លិប Leicester បានរងពិន័យកាតក្រហម សម្រាប់ការប្រជែងដណ្តើមបាល់ដ៏គ្រោះថ្នាក់លើកីឡាករ Fornals នៅមុនពេលបញ្ចប់តង់ទី១។ ខ្សែបម្រើ Said Benrahma បានរកគ្រាប់បាល់ទី២សម្រាប់ក្រុម West Ham នៅមុនពេលខ្សែបម្រើ Youri Tielemans បានវាយបក១គ្រាប់វិញសម្រាប់ក្រុម Leicester។
ខ្សែប្រយុទ្ធ Antonio បានចូលលេងក្នុងការប្រកួតនេះ ដោយមានកំណត់ត្រានៃការរកគ្រាប់បាល់ស្មើជាមួយនឹង Paolo Di Canio ក្រោយពីរកបាន៤៧គ្រាប់ដូចគ្នា សម្រាប់ក្រុម West Ham ក្នុងសម័យកាល Premier League។ កីឡាករវ័យ៣១ឆ្នាំរូបនេះ បានបំបែកកំណត់ត្រាតាមរយៈការស៊ុតបាល់បញ្ចូលទី២គ្រាប់ នៅជិតបញ្ចប់ការប្រកួត ខណៈដែល West Ham បានបន្តទទួលជ័យជម្នះ ក្រោយពីបានផ្តួលក្រុម Newcastle ក្នុងលទ្ធផល ៤-២ កាលពីថ្ងៃបើករដូវកាល៕
ប្រភពព័ត៌មាន៖ Channel News Asia