បរទេស៖ លោក Mikel Arteta បានជំរុញឲ្យក្រុមធ្លាក់ទម្រង់លេង Arsenal របស់លោក ព្យាយាមលុបចោលស្រមោលខ្មៅនៅជុំវិញក្លិបនេះ តាមរយៈការផ្តួលក្រុម West Bromwich Albion ក្នុងការប្រកួតពាន League Cup នៅរាត្រីនេះ។
លោក Arteta កំពុងតែប្រឈមមុខនឹងការអំពាវនាវឲ្យបណ្តេញចេញរួចជាស្រេច ក្រោយពីក្រុម Arsenal បានរងបរាជ័យក្នុងការប្រកួតបើកឆាកទាំង២លើករបស់ពួកគេ ក្នុងក្របខ័ណ្ឌ Premier League នៅរដូវកាលនេះ នៅពេលប្រកួតជាមួយនឹងក្រុម Brentford និង Chelsea។ ការធ្លាក់ចេញយ៉ាងអាម៉ាសក្នុងការប្រកួតដណ្តើមពាន League Cup ជុំទី២ នៅពេលប្រកួតជាមួយនឹងក្រុមដែលលេងក្នុងក្របខ័ណ្ឌ Championship នឹងដាក់សម្ពាធបន្ថែមទៀតលើគ្រូបង្វឹករបស់ក្រមកាំភ្លើងធំមួយនេះ នៅមុនពេលការប្រកួតដ៏សំខាន់នៅចុងសប្តាហ៍នេះ នៅលើទឹកដីក្រុម Manchester City ដែលជាម្ចាស់ជើងឯកក្របខ័ណ្ឌ Premier League។ បើទោះបីរងនូវផលប៉ះពាល់ដោយសារតែការឆ្លងវីរុសកូវីដ ១៩ ក្នុងក្រុមរបស់លោកក៏ដោយ ប៉ុន្តែ គ្រូបង្វឹកសញ្ជាតិអេស្ប៉ាញរូនេះ នឹងប្រើប្រាស់ក្រុមជម្រើសដំបូងនាកីឡដ្ឋាន Hawthorns ដើម្បីព្យាយាមធ្វើឲ្យក្រុម Arsenal វិលទៅកាន់ផ្លូវនៃជ័យជម្នះវិញ។
លោក Arteta បានប្រាប់គេហទំព័ររបស់ Arsenal ថា៖ «គោលបំណងគឺការឈ្នះការប្រកួតនេះ និងឈានទៅវគ្គបន្ត។ យើងក៏នឹងព្យាយាមទទួលកីឡាករត្រឡប់មកវិញផងដែរ ប្រសិនបើអាច ដើម្បីជួយដល់យើង ពីព្រោះបន្ទាប់មក យើងនឹងត្រូវប្រកួតជាមួយឹនងក្រុម Manchester City នៅចុងសប្តាហ៍នេះ និងព្យាយាមលើកស្មារតីរបស់កីឡាករ»៕
ប្រភពព័ត៌មាន៖ Channel News Asia