បរទេស៖ កីឡាកររបស់ក្រុមមេឃខៀវ Manchester City មានសុទិដ្ឋិនិយមថាពួកគេនិងទទួលបានខ្សែប្រយុទ្ធជួរមុខ Harry Kane នៅរដូវកាលថ្មីនេះ។
កីឡាករវ័យ ២៨ ឆ្នាំរបស់ក្រុមនៅតែស្ថិតក្នុងលើរ៉ាដារបស់ក្រុមម្ចាស់ជើងឯក Premier League មុនពេលទីផ្សារដោះដូរកីឡាករនិងត្រូវបិទបញ្ចប់នៅថ្ងៃទី៣១សីហា ២០២១ខាងមុខនេះ។ ទោះបីជា រហូតមកដល់ពេលនេះប្រធានក្លឹបលោក Daniel Levy នៅតែបន្តបដិសេធមិនព្រមលក់តារាឆ្នើមរបស់ខ្លួននៅឡើយខណៈដែលរូបលោកបានដាក់តម្លៃខ្លួនទិញផ្តាច់កុងត្រាប្រមាណ ១៥០ លានផោនសម្រាប់ប្រធានក្រុមជម្រើសជាតិជាតិអង់គ្លេសរូបនេះ ខណៈសាម៉ីខ្លួនមានបំណង ចាកចេញពីក្លឹបដើម្បីស្វែងរកឪកាសឈ្នះពានជាសមូហភាពសម្រាប់ក្លឹបជាលើក ដំបូងរបស់គាត់។ យោងតាមសារព័ត៌មាន The Athletic បាន ឲ្យដឹង ថា Man City កំពុងរៀបចំដាក់សំណើដេញថ្លៃលើកទី ២ សម្រាប់ Kane បន្ទាប់ពីការផ្តល់ជូន ១០០ លានផោនរបស់ពួកគេត្រូវបានបដិសេធយ៉ាងឆាប់រហ័សខណៈអ្នកចាត់ការទូទៅសញ្ជាតិអេស្បាញលោក Pep Guardiola ជឿជាក់ថាខ្សែប្រយុទ្ធរូបនេះនឹងមកដល់កីឡាដ្ឋាន Etihad ក្នុងពេលឆាប់ៗនេះ។
ទោះយ៉ាងណាកាលពីពេលថ្មីៗនេះលោក Levy ត្រូវបានចោតប្រកាន់ថាបានបដិសេធមិនទទួលទូរស័ព្ទ ពីភាគីក្លឹប Man.City ខណៈដែលរូបលោកត្រូវបានមជ្ឈដ្ឋានបាល់ទាត់មើលឃើញថា ព្យាយាមរក្សាទុក Kane ខណៈ Man City មិនស្ទាក់ស្ទើរក្នុងការត្រៀមចំណាយទឹកប្រាក់១៥០ លានផោនដើម្បីបំពេញបំណង ប្រធានក្លឹប Spurs ដែលចង់បាន។ Kane បានបង្ហាញខ្លួនជាលើកដំបូងនៅរដូវកាលនេះប៉ុន្តែលេងជាកីឡាករ បម្រុងពេលផ្តួល Wolverhampton Wanderers នៅចុងសប្តាហ៍មុនស្របពេលកិច្ចសន្យារបស់ខ្លួនជាមួយ Tottenham មានសុពលភាពដល់ឆ្នាំ ២០២៤៕
ប្រភពព័ត៍មាន៖ Sportsmole
