បរទេស៖ លោក Antonio Conte អ្នកចាត់ការទូទៅរបស់ក្រុម Tottenham Hotspur ត្រូវការឲ្យខ្សែប្រយុទ្ធ Harry Kane ជាសះស្បើយពីរបួសខ្នង មិនថា ត្រូវធ្វើបែបណាក៏ដោយ និងលេងក្នុងការប្រកួតក្របខ័ណ្ឌ Premier League នៅលើទឹកដីក្រុម Burnley នៅរាត្រីនេះ ក្រោយពីកាបង្ហាញពីទម្រង់លេងយ៉ាងល្អរបស់តារាឆ្នើមរូបនេះ បានជួយឲ្យពួកគេផ្តួលក្រុម Manchester City។
គ្រាប់បាល់ស៊ុតបញ្ចូលទី២គ្រាប់ពី Kane ក្នុងនោះរាប់បញ្ចូលទាំងគ្រាប់បាល់ឈ្នះនៅជិតបញ្ចប់ការប្រកួត បានធ្វើឲ្យការប្រជែងដណ្តើមពានកាន់តែបើកទូលាយ ខណៈដែល Tottenham បានផ្តួលក្រុមកំពុងនាំមុខ Man City ក្នុងលទ្ធផល ៣-២ ក្នុងការប្រកួតដ៏រំភើបនាកីឡដ្ឋាន Etihad។ Tottenham ដែលកំពុងតែស្ថិតក្នុងចំណាត់ថ្នាក់លេខ៨ នៅលើតារាង ដោយមាន៣៩ពិន្ទុ ក្រោយពីការប្រកួត២៣លើក នឹងត្រូវប៉ះជាមួយនឹងក្រុម Burnley ក្នុងកម្មវិធីប្រកួតដែលត្រូវរៀបចំឡើងវិញ ក្រោយពីជំនួបកាលពីខែវិច្ឆិកា របស់ពួកគេ ត្រូវបានលុបចោល ដោយសារតែការធ្លាក់ព្រិលខ្លាំងនៅកីឡដ្ឋាន Turf Moor។
លោក Conte បានប្រាប់អ្នកយកព័ត៌មានកាលពីថ្ងៃអង្គារថា៖ «Harry មានបញ្ហាត្រង់ខ្នង ប៉ុន្តែ រូបគេត្រូវតែលេង។ បើទោះបីរូបគេនៅសល់ជើង១ រូបគេត្រូវតែលេង។ រូបគេជាកីឡាករល្អ ហើយដឹងពីភាពសំខាន់របស់គេក្នុងក្រុមនេះ»៕
ប្រភពព័ត៌មាន៖ Channel News Asia
