បរទេស៖ ក្របខ័ណ្ឌ Premier League បានបញ្ជាក់ថាក្លឹបរបស់ខ្លួនមានការស្ទាក់ស្ទើរប៉ុន្តែបានសម្រេចមតិជាឯកច្ឆន្ទថានិងមិនសម្រេចចិត្តអនុញ្ញាតិអោយកីឡាករដែលកំពុងលេងនៅលីកអាជីពរបស់ពួកគេធ្វើដំណើរទៅចូលរួមការប្រកួតនៅក្នុងប្រទេសដែលជាប់ក្នុងបញ្ជីក្រហមអំឡុងពេលប្រកួតលក្ខណៈអន្តរជាតិ (World Cup ២០២២ Qualify) នៅក្នុងខែកញ្ញាខាងមុខនេះ។ ក្រោមច្បាប់របស់រដ្ឋាភិបាលចក្រភពអង់គ្លេសបច្ចុប្បន្នកីឡាករបាល់ទាត់ទាំងអស់នឹងត្រូវខកខានហ្វឹកហាត់និងចូលរួមការប្រកួតជាច្រើនថ្ងៃដោយសារតែត្រូវធ្វើចត្តាឡើស័ករយៈពេលយ៉ាងហោចណាស់ ១០ ថ្ងៃក្រោយពេលវិលត្រឡប់មកចក្រភពអង់គ្លេសវិញ។
ក្របខ័ណ្ឌ Premier League បានបញ្ជាក់យ៉ាងដូច្នេះថាៈ ការពិភាក្សាយ៉ាងទូលំទូលាយ បានកើតឡើងជាមួយសមាគមបាល់ទាត់និងរដ្ឋាភិបាលដើម្បីស្វែងរកដំណោះស្រាយប៉ុន្តែសម្រាប់ករណីនេះលោកថាគ្មានការលើកលែងត្រូវបានផ្តល់ឱ្យនោះទេ ។ទោះយ៉ាងណាលោក Richard Masters នាយកប្រតិបត្តិនៃក្របខ័ណ្ឌ Premier League តែងតែគាំទ្របំណងប្រាថ្នារបស់កីឡាករតំណងអោយជាតិសាសន៏និងប្រទេសរបស់ពួកគេដែលនេះគឺជាមោទនភាពសម្រាប់អ្នកពាក់ព័ន្ធទាំងអស់។
ថ្មីៗនេះសហព័ន្ធបាល់ទាត់ពិភពលោកហៅកាត់ថា FIFA បានពន្យាពេលប្រកួតលក្ខណៈអន្តរជាតិរយៈពេលពីរថ្ងៃនៅខែកញ្ញានិងតុលា សម្រាប់ក្រុមមកពី អាមេរិកខាងត្បូងដើម្បីឱ្យប្រទេសនានាអាចមានពេលវេលាគ្រប់គ្រាន់សម្រាប់ព្រឹត្តការណ៏ប្រកួតការប្រកួតជម្រុះបាល់ទាត់ពិភពលោក World Cup ២០២២ ដែលត្រូវបានពន្យារពេលដោយសារតែការរីករាលដាលនៃមេរោគកូវីត-១៩។
ប្រភពព័ត៍មាន៖ BBC
