បរទេស៖ លោក Mikel Arteta សង្ឃឹមថា ការវិលត្រឡប់របស់ Pierre-Emerick Aubameyang នឹងជួយឲ្យក្រុម Arsenal វិលទៅរកភាពខ្លាំងវិញ ក្រោយពីតារាឆ្នើមអន្តរជាតិហ្គាបុងរូបនេះ បានអបអរការបង្ហាញខ្លួនជាលើកដំបូងរបស់គេនៅរដូវកាលនេះ ជាមួយនឹងការស៊ុតបាល់បញ្ចូលទី៣គ្រាប់ ក្នុងពេលក្រុមខ្លួនយកឈ្នះលើក្រុម West Bromwich Albion ៦-០ ក្នុងការប្រកួត League Cup កាលពីថ្ងៃពុធ។
Aubameyang បានអវត្តមានក្នុងពេលក្រុម Arsenal បានរងបរាជ័យក្រោមស្នាដៃក្រុម Brentford ក្នុងការប្រកួតបើករដូវកាលនៃក្របខ័ណ្ឌ Premier League របស់ពួកគេ បន្ទាប់ពីរូបគេបានឆ្លងវីរុសកូវីដ ១៩។ ប្រធានក្រុមរបស់ Arsenal រូបគេបានចូលលេងក្នុងនាមជាកីឡាករបម្រុងក្នុងពេលក្រុមខ្លួនបានរងបរាជ័យក្នុងលទ្ធផល ២-០ ពេលប្រកួតជាមួយនឹងក្រុម Chelsea ប៉ុន្តែ មិនអាចជួយឲ្យក្រុមរបស់ខ្លួនគេចផុតពីការជួបលទ្ធផលដ៏ខកចិត្តបំផុតនៅដើមរដូវកាលនេះឡើយ។ ស្របពេលដែលសម្ពាធផ្សេងៗបានធ្លាក់ទៅលើគ្រូបង្វឹករបស់ Arsenal លោក Arteta ខ្សែប្រយុទ្ធ Aubameyang បានសង្គ្រោះក្រុមខ្លួននៅពេលប្រកួតជាមួយនឹងក្រុម West Bromwich របស់ក្របខ័ណ្ឌ Championship នាកីឡដ្ឋាន Hawthorns។
នៅពេលដែលត្រូវបានចោទសួរថា ការវិលត្រឡប់របស់អ្នកគាំទ្រ ក្រោយពីការបញ្ចប់ការរិតត្បិតដោយសារតែបញ្ហាកូវីដ ១៩ អាចបង្កើតឲ្យមានការប្រែប្រួលទៅលើទម្រង់លេងរបស់ Aubameyang ឬយ៉ាងណា លោក Arteta បានឆ្លើយតបថា៖ «ខ្ញុំក៏សង្ឃឹមអ៊ីចឹងដែរ។ ពិតណាស់ រូបគេពិតជារីករាយ ហើយរូបគេត្រូវការទំនាក់ទំនងជាមួយនឹងមនុស្ស ជាមួយនឹងក្រុមគ្រួសារ មិត្តភក្តិ និងអ្នកគាំទ្រ»៕
ប្រភពព័ត៌មាន៖ Channel News Asia