បរទេស៖ ក្លិបបិសាចក្រហម Manchester United បានប្រកាសថា Cristiano Ronaldo នឹងធ្វើការវិលត្រឡប់ដ៏គួរឲ្យរំជួលចិត្តមួយទៅកាន់កីឡដ្ឋាន Old Trafford ក្រោយពីពួកគេបានយល់ព្រមលើតម្លៃខ្លួនមួយជាមួយនឹងក្លិប Juventus សម្រាប់ម្ចសា់ពានបាល់មាស Ballon d’Or ៥សម័យកាលរូបនេះ។
Ronaldo ត្រូវបានរំពឹងទុកថា នឹងចុះកុងត្រារយៈពេល២ឆ្នាំ ដោយរង់ចាំតែទិដ្ឋាការ និងការត្រួតពិនិត្យសុខភាពប៉ុណ្ណោះ ខណៈដែល Man United បានយល់ព្រមលើតម្លៃខ្លួនជាគោល១៥លានអឺរ៉ូ (ស្មើនឹង១៨លានដុល្លារអាមេរិក) ជាមួយនឹងក្លិបរបស់អ៊ីតាលី បូករួមទាំងប្រាក់ឧត្ថម្ភនានាចំនួន៨លានអឺរ៉ូទៀត។ ក្លិប Manchester City ទំនងដូចជាគោលដៅដែលមានភាពច្បាស់លាស់ជាងគេសម្រាប់ខ្សែប្រយុទ្ធអន្តរជាតិព័រទុយហ្គាល់រូបនេះ នៅមុនពេលព្រឹកថ្ងៃសុក្រ។
ប៉ុន្តែ ក្រោយពីការប្រែប្រួលក្នុងរយៈពេល៤៨ម៉ោងចុងក្រោយ ដោយគេឃើញភ្នាក់ងារតំណាងឲ្យ Ronaldo គឺលោក Jorge Mendes បានរៀបចំកិច្ចពិភាក្សាជាមួយនឹងមន្ត្រីរបស់ក្លិប Juventus ក្នុងទីក្រុង Turin កាលពីថ្ងៃពុធ ជុំវិញការផ្ទេរទៅកាន់កីឡដ្ឋាន Etihad ក្លិប Man City បានប្រកាសនៅត្រឹមបាយថ្ងៃត្រង់កាលពីថ្ងៃសុក្រថា ពួកគេលែងចាប់អារម្មណ៍ហើយ។ បន្ទាប់មក មានការលេចឮថា លោក Mendes ក៏បានរៀបចំកិច្ចពិភាក្សាជាមួយនឹងក្លិប Man United ផងដែរ នៅមុនពេលមានសេចក្តីប្រកាសភាគីទាំង២បានអះអាងថា ពួកគេបានឈានដល់ការព្រមព្រៀងគ្នាជាមួយនឹងក្លិប Juventus ហើយ ដើម្បីនាំយកកីឡាករម្នាក់របស់ពួកគេត្រឡប់មកវិញ។
Ronaldo បានចូលរួមជាមួយនឹងក្លិប Man United ពីក្លិប Sporting Lisbon ក្នុងនាមជាយុវជនម្នាក់ និងបានចំណាយពេលអស់៦រដូវកាលនៅកីឡដ្ឋាន Old Trafford នៅមុនពេលផ្ទេរទៅកាន់ក្លិប Real Madrid ក្នុងតម្លៃខ្លួនជាកំណត់ត្រាពិភពលោកចំនួន៨០លានផោន កាលពីឆ្នាំ២០០៩។ ក្នុងរយៈពេល៦រដូវកាលជាមួយនឹង Man Utd រូបគេបានស៊ុតបាល់បញ្ចូលទី១១៨គ្រាប់ ក្នុងការប្រកួត២៩២លើក៕
ប្រភពព័ត៌មាន៖ The Guardian
