បរទេស៖ ខ្សែប្រយុទ្ធ Lionel Messi បានចូលលេងក្នុងនាមជាកីឡាករបម្រុង ដើម្បីបង្ហាញខ្លួនជាលើកដំបូងរបស់គេសម្រាប់ក្លិប Paris Saint-Germain កាលពីថ្ងៃអាទិត្យ ប៉ុន្តែ ខ្សែប្រយុទ្ធ Kylian Mbappe បានដណ្តើមយកការចាប់អារម្មណ៍នានា តាមរយៈការស៊ុតបាល់បញ្ចូលទីទាំង២គ្រាប់ក្នុងពេលក្រុមខ្លួនបានយកឈ្នះលើក្រុម Reims ក្នុងលទ្ធផល ២-០ ក្នុងការប្រកួតក្របខ័ណ្ឌ Ligue 1។
Messi ដែលពាក់អាវលេខ៣០ បានចូលលេងក្នុងនាមជាកីឡាករបម្រុងនៅនាទី ទី៦៦ ដើម្បីជំនួស Neymar នៅកីឡដ្ឋាន Stade Auguste-Delaune ដែលជាកន្លែងអ្នកគាំទ្រប្រមាណជា២១០០០នាក់ បានស្រែកច្រៀងឈ្មោះរបស់គេ ក្នុងពេលរូបគេបានបង្ហាញខ្លួនក្នុងការកម្តៅសាច់។ តារាឆ្នើមអន្តរជាតិអាហ្សង់ទីនរូបនេះ មិនធ្លាប់បានចូលលេងសោះបើគិតចាប់តាំងពីផ្ទេរទៅកាន់ទីក្រុងប៉ារីស ពីក្លិប Barcelona កាលពីជិត៣សប្តាហ៍មុន ខណៈដែលការបង្ហាញខ្លួនជាលើកចុងក្រោយរបស់គេ បានកើតឡើងក្នុងការប្រកួតព្រឹត្តិការណ៍ Copa America វគ្គផ្តាច់ព្រ័ត្រ កាលពីថ្ងៃទី១១ ខែកក្កដា ដែលនៅពេលនោះប្រទេសរបស់គេបានយកឈ្នះលើប្រេស៊ីល។
ម្ចាស់ពានរង្វាន់បាល់មាស Ballon d’Or ៦សម័យកាលរូបនេះ នឹងត្រូវតែរង់ចាំការរកគ្រាប់បាល់ជាលើកដំបូងសម្រាប់ក្លិបថ្មីរបស់គេ និងការចូលលេងក្នុងជម្រើសទាំង១១នាក់ដំបូងជាលើកទី១របស់គេ ដែលអាចនឹងកើតឡើងក្នុងពេលក្រុម PSG ធ្វើជាម្ចាស់ផ្ទះទទួលក្រុម Clermont ក្នុងការប្រកួតបន្ទាប់ នាថ្ងៃទី១១ ខែកញ្ញា៕
ប្រភពព័ត៌មាន៖ Channel News Asia