បរទេស៖ ក្រុម Tottenham Hotspur បានរក្សាកំណត់ត្រាយ៉ាងល្អ១០០%របស់ពួកគេនៅដើមរដូវកាលនៃក្របខ័ណ្ឌ Premier League ក្រោយពីបានយកឈ្នះក្នុងលទ្ធផល ១-០ លើក្រុម Watford កាលពីថ្ងៃអាទិត្យ ខណៈដែលខ្សែប្រយុទ្ធ Son Heung-min ជាអ្នករកបានគ្រាប់បាល់កាត់សេចក្តីក្នុងតង់ទី១។
Son បានស៊ុតបាល់ពិន័យ Free-kick ចូលក្នុងប្រអប់ទីយ៉ាងល្អ ពីតំបន់ខាងឆ្វេង ខណៈដែលអ្នកចាំទី Daniel Bachmann របស់ Watford មិនអាចសង្គ្រោះបាល់បានឡើយ នៅរយៈពេល៣នាទីចុក្រោយនៃការប្រកួតតង់ទី១។ នេះគឺជាគ្រាប់បាល់ទី៧២រសប់តារាឆ្នើមអន្តរជាតិកូរ៉េខាងត្បូងរូបនេះ ក្នុងការបង្ហាញខ្លួនជាលើកទី២០០របស់គេក្នុងក្របខ័ណ្ឌ Premier League សម្រាប់ក្លិប Spurs ដើម្បីជួយឲ្យពួកគេរក្សាកំណត់ត្រាយ៉ាងល្អ១០០% ក្រោមការដឹកនាំរបស់គ្រូបង្វឹកថ្មីលោក Nuno Espirito Santo និងជួយឲ្យពួកគេឡើងឈរលើកំពូលតារាង ដោយមាន៩ពិន្ទុពេញ ពីការប្រកួត៣លើក។
Tottenham នឹងឈានទៅកាន់ថ្ងៃសម្រាកសម្រាប់ការប្រកួតអន្តរជាតិ ក្រោយពីបានឈ្នះការប្រកួតទាំង៣លើកក្នុងលទ្ធផល ១-០ ដូចគ្នា ស្របពេលដែល Watford ស្ថិតក្នុងចំណាត់ថ្នាក់លេខ១២ ដោយមាន៣ពិន្ទុ ហើយក្រុម Spurs នឹងពេញចិត្តជាមួយនឹងទម្រង់លេងរបស់ក្រុមខ្លួន បើទោះបីមានភាពជ្រួលច្របល់ជុំវិញខ្សែប្រយុទ្ធ Harry Kane ក៏ដោយ៕
ប្រភពព័ត៌មាន៖ Channel News Asia