បរទេស៖ ខ្សែប្រយុទ្ធ Cristiano Ronaldo នឹងពាក់លេខ៧ម្តងទៀត នៅក្លិប Manchester United ក្រោយពីខ្សែប្រយុទ្ធ Edinson Cavani បានយល់ព្រមប្តូរអាវរបស់គេ។ Ronaldo ក៏បានពាក់អាវលេខ៧ ផងដែរ អំឡុងពេលដែលរូបគេបានលេងឲ្យក្លិប Man United ជាលើកដំបូងចាប់ពីចន្លោះឆ្នាំ២០០៣ រហូតដល់ឆ្នាំ២០០៩។
ខ្សែប្រយុទ្ធវ័យ៣៦ឆ្នាំរូបនេះ បានចូលជាមួយនឹងក្លិប Man United ម្តងទៀត ពីក្លិប Juventus កាលពីសប្តាហ៍មុន ប៉ុន្តែ Cavani បានពាក់អាវលេខ៧នេះ តាំងពីដើមរដូវកាលមកម្ល៉េះ ដែលនាំឲ្យ Ronaldo ត្រូវឈមមុខនឹងការពាក់អាវលេខផ្សេង។ ប៉ុន្តែ Cavani បានយល់ព្រមប្តូរយកអាវលេខ២១វិញ ដែលជាលេខអាវរូបគេពាក់ឲ្យក្រុមបាល់ទាត់ជម្រើសជាតិអ៊ុយរ៉ូហ្គាយ ហេតុនេះ Ronaldo អាចពាក់អាវលេខចាស់របស់គេវិញបានហើយ។
ក្លិប Man United បានឲ្យដឹងក្នុងសេចក្តីថ្លែងការណ៍មួយថា៖ «ក្លិប Manchester United អាចប្រកាសបានថា Cristiano Ronaldo នឹងពាក់អាវលេខ៧ ក្រោយពីវិលទៅកាន់កីឡដ្ឋាន Old Trafford»៕
ប្រភពព័ត៌មាន៖ Channel News Asia
