បរទេស៖ លោក Ole Gunnar Solskjaer បានរារាំងកីឡាករ ៥ នាក់មិនឱ្យចាកចេញពីក្រុម Manchester United នៅមុនពេលទីផ្សារដោះដូរកីឡាករ បានបិទកាលពីថ្ងៃទី៣១សីហា ២០២១នេះ។ទោះយ៉ាងណាក្រុមជើងឯកអង់គ្លេស២០សម័យបានចំណាយប្រាក់យ៉ាងច្រើនក្នុងពេលដំណើរការ ដោះដូរកីឡាករកាលពីលើកទី១នេះ ដោយនាំយកមកនូវ Jadon Sancho, Raphael Varane និង Cristiano Ronaldo ក្នុងតម្លៃសរុបប្រមាណជា ១៣៥ លានផោន។
ការមកដល់របស់កំពូលតារាឆ្នើមលំដាប់ពិភពលោកខាងលើនេះនាំអោយមជ្ឈដ្ឋានទូទៅមើលឃើញថាកីឡាករមួយចំនួនដែលមានវត្តមាននៅក្នុងក្លឹប និង ថមថយឪកាសបង្ហាញខ្លួនចូលលេងច្រើននៅទឹកដី Old Trafford នៅរដូវកាលនេះ។ ដូច្នេះហើយទើបពួកគេមួយចំនួនមានទំនាក់ទំនងក្នុង ការចាកចេញពីក្លឹប។ ប្រភពពីគេហទំព័រ The Mirror បានចុះផ្សាយថា លោក Solskjaer បានបដិសេធឱកាសអនុញ្ញាតិអោយកីឡាករមួយចំនួនចាកចេញ ព្រោះតែគ្រូបង្វឹកសញ្ជាតិន័រវេរូបនេះចង់ឱ្យមានក្រុមធំដើម្បីទប់ទល់ប្រើប្រាស់សម្រាប់ ការប្រកួតដ៏មមាញឹក។ កីឡាករទាំងនោះរួមមាន Edinson Cavani និង Anthony Martial ដែលមានទំនាក់ទំនងជាមួយក្លឹប Barcelona និង Paris Saint-Germain ។
ទន្ទឹមនឹងនេះដែរ Donny van de Beek ចាប់អារម្មណ៍ក្នុងការចូលរួមជាមួយក្រុម Everton ក្នុងលក្ខខណ្ឌខ្ចីជើងសម្រាប់រដូវកាលនេះប៉ុន្តែលោក Solskjaer ក៏បានបដិសេធចំពោះសំណើរខ្សែបម្រើរូបនេះផងដែរ។ Diogo Dalot ដែលបញ្ចប់កិច្ចសន្យាខ្ចីជើងនៅAC.Milan ក៏មិនបានផ្លាស់ទៅ Borussia Dortmund នោះទេខណៈ កីឡាករវ័យក្មេង Anthony Elanga ក៏ត្រូវបានបដិសេធផងដែរពីការខ្ចីជើងខណៈដែលលោកSolskjaer បានធានាអះអាងនិងផ្តល់តួនាទីជម្រើសដំបូងដល់រូបគេ៕
ប្រភពព័ត៍មាន៖ Sportsmole
