បរទេស៖ ខ្សែការពារ Virgil van Dijk របស់ក្លិប Liverpool បានជាសះស្បើយពីរបួសតិចតួត្រង់កជើង ដែលរូបគេបានជួបប្រទះអំឡុពេលបំពេញការតព្វកិច្ចអន្តរជាតិជាមួយនឹងក្រុមបាល់ទាត់ជម្រើសជាតិហូឡង់ ហើយនិងអាចចូលលេងបានសម្រាប់ការប្រកួតក្របខ័ណ្ឌ Premier League របស់ពួកគេជាមួយនឹងក្រុម Leeds United នៅចុងសប្តាហ៍នេះ។
នេះបើយោងទៅតាមការបញ្ជាក់របស់លោកគ្រូបង្វឹក Juergen Klopp កាលពីថ្ងៃព្រហស្បតិ៍។ ការវះកាត់ជង្គង់ បានធ្វើឲ្យ Van Dijk អវត្តមានស្ទើរតែទាំងស្រុងកាលពីរដូវកាលមុន និងការប្រកួតព្រឹត្តិការណ៍ Euro នៅឆ្នាំនេះ ដោយក្រុមជម្រើសជាតិហូឡ់ បានធ្លាក់ចេញក្រោមស្នាដៃក្រុមជម្រើសជាតិសាធារណរដ្ឋឆែក ក្នុងវគ្គ១៦ក្រុមចុងក្រោយ។ កីឡាករវ័យ៣០ឆ្នាំរូបនេះ បានរងរបួស ពីការប្រជែងដណ្តើមបាល់នៅជិតបញ្ចប់ការប្រកួតក្នុងពេលក្រុមខ្លួនបានយកឈ្នះលើក្រុមជម្រើសជាតិតួកគី ក្នុងលទ្ធផល ៦-១ កាលពីថ្ងៃអង្គារ។ លោក Klopp បានប្រាប់គេហទំព័ររបស់ Liverpool ថា៖ «ស្ថានភាពរបស់ Virgil ពិតជាផ្តល់ការបារម្ភយ៉ាងខ្លាំង។
ប៉ុន្តែខ្សែការពាររូបនេះ បានបញ្ជាក់ថា រូបគេរឹងមាំ១០០%ហើយ»។ លោក Klopp ដែលក្រុមរបស់លោកបានឈ្នះការប្រកួត២លើកក្នុងចំណោមការប្រកួតលីកទាំង៣លើកនៅរដូវកាលនេះ បានបញ្ជាក់ថា ខ្សែបម្រើអន្តរជាតិហ្គីណេ Naby Keita ក៏មិនមានបញ្ហាអ្វីដែរ ក្រោយពីវិលមកពីប្រទេសអាហ្វ្រិកខាងលិចវិញ អំឡុងពេលលោកប្រធានាធិបតី Alpha Conde ត្រូវបានទម្លាក់ពីតំណែង ក្រោមការធ្វើរដ្ឋប្រហារយោធា៕
ប្រភពព័ត៌មាន៖ Channel News Asia
