បរទេស៖ ខ្សែប្រយុទ្ធ Cristiano Ronaldo នឹងមិនបំភ្លេចថ្ងៃប្រកួតដំបូងនៃការបង្ហាញខ្លួនជាលើកទី២របស់គេសម្រាប់ក្លិប Manchester United បានឡើយ។ នៅពីមុខអ្នកគាំទ្រដ៏ច្រើនកុះករនាកីឡដ្ឋាន Old Trafford ខ្សែប្រយុទ្ធវ័យ៣៤ឆ្នាំរូបនេះ បានស៊ុតបាល់បញ្ចូលទី២គ្រាប់ ក្នុងពេលក្រុមម្ចាស់ផ្ទះបានយកឈ្នះលើក្រុម Newcastle ក្នុងលទ្ធផល ៤-១ កាលពីថ្ងៃសៅរ៍។
ក្រោយពី Ronaldo បានស៊ុតបាល់បញ្ចូលទី២គ្រាប់ អ្នកគាំទ្រនៅក្នុងកីឡដ្ឋាន ក៏រំភើបរីករាយជាមួយនឹងគ្រាប់បាល់យ៉ាងល្អរបស់ Bruno Fernandes និងតារឆ្នើមម្ចាស់ផ្ទះ Jesse Lingard ផងដែរ។ Lingard និង Ronaldo មានប្រវត្តិដ៏គួរឲ្យចងចាំនៅក្នុងក្លិប Man United បើទោះបីការបង្ហាញខ្លួនជាលើកដំបូងរបស់កីឡាករសញ្ជាតិអង់គ្លេសរូបនេះ បានកើតឡើ ក្រោយពី Ronaldo ម្ចាស់បាល់មាស Ballon d’Or ៥សម័យកាល បានផ្ទេរទៅកាន់ក្លិប Real Madrid ក្នុងឆ្នាំ២០០៩ រួចទៅហើយក្តី។
រយៈពេល៦ឆ្នាំ នៅមុនពេលការផ្ទេរដ៏គួរឲ្យចាប់អារម្មណ៍នេះ ខ្សែប្រយុទ្ធដែលរកបានគ្រាប់បាល់អន្តរជាតិច្រើនជាងគេរូបនេះ បានជួបនឹង Lingard ជាលើកដំបូង។ ពួកគេទាំង២នាក់បានជួបគ្នាភ្លាមៗ ក្រោយពី Ronaldo បានចូលរួមជាមួយនឹងក្លិប Man United ពី Sporting Lisbon ក្នុងវ័យ១៨ឆ្នាំ។ នៅពេលនោះ Lingard មានវ័យត្រឹមតែ១០ឆ្នាំប៉ុណ្ណោះ និងជាសមាជិកម្នាក់របស់ក្រុមយុវជន Man United។ អំឡុងពេលជួបគ្នា Ronaldo បានបង្ហាញពីជំនាញលេងកីឡាបាល់ទាត់ជាច្រើន ហើយរូបភាពនោះ ទំនងដូចជាមានភាពចម្លែកបន្ថែមទៀតនៅពេលនេះ ក្រោយពីការប្រកួតជាមួយនឹងក្រុម Newcastle៕
ប្រភពព័ត៌មាន៖ Givemesport
